Ua moneda de prata eibérica an Sendin

Un die fui a besitar ua eirmita acerca de Fariza, an Spanha, de l outro lado del riu Douro, delantre de Bilachana, i quedei admirado. La fiesta que fázen alhá, cháman-le la fiesta de ls Viriatos. Muitos outores dízen que Viriato andubo pur estes lados. Ten ua Státua an Çamora. Cierto ou nó, l que se puode dezir ye que giente amportante, de l sou tiempo, porqui passou. Senó, cumo se splica que ne l termo de Sendin se ancuntrara ua moneda eibérica de prata?

La stória bai-se fazendo als poucos, i a las bezes, tenemos que ancuntrar decumientos i saber liendas, ó tradiciones, que fágan la liaçon para tirar conclusiones. Dar a coincer ye un ampercípio para quien querga studar bien l assunto.

Pus quedai a saber, que ye cierto, que esto ye berdade. La tradicion eijiste i la moneda tamien.(1)

(1)-Ber << Mem. Arq.- Hist. Do Distrito de Bragança >> Tomo IX, pag. 477, por Francisco Manuel Alves.

Abiso:

Este testo, cunsante las regras de la Cumbençon Ourtográfica de la Léngua Mirandesa i de la sue Purmeira Adenda, stá solo screbido cun L- an percípio de palabra, a la moda de l mirandés de Sendin.