Ls çapateiros, l mais amportante oufício de Sendin al lhargo de seclos

1. Las listas de l’Anquesiçon que ténen a ber cun Sendin dan-mos anformaçon subre l oufício de las pessonas, l que ye mui amportante para coincer las atebidades de ls sendineses nesse tiempo. Quedamos ampressionados al ber que hai un oufício que aparece an todos ls anhos a que respéitan aqueilhas listas: l oufício de çapateiro.

Lhougo an 1612, anho de l purmeiro porcesso que coincemos, ye solo nomeado un tal João Gomes, cul oufício de çapateiro. L mesmo se diga quanto a un de ls redadeiros porcessos, de 1696, que respeita a un çapateiro que le chamában Manuel Henriques Carção.

Podemos debedir l’acion de l’Anquesiçon an Sendin an dues lebas: la 1ª leba de 1612 a 1637 i la 2ª leba de 1667 a 1721.

Na purmeira leba aparécen nomeados 11 çapateiros, sendo cinco an 1620 i outros tantos an 1621. Eiqui quédan ls sous nomes:

Diogo Dias

Diogo Vaz

Francisco Cardozo

Henrique Rodrigues

Henriques

João Gomes

Manoel Fernandes

Manuel Gomes

Manuel Loppes

Pero Duarte

Pero Rodrigues

Nun puodo deixar de chamar l’atençon para dous apelhidos que se manténen cumo çapateiros, an Sendin, até al seclo XX: Lopes i Fernandes. Al menos un ramo de la família Fernandes quedou cula nomeada de Çapateiros, i inda you me lhembro bien dun que moraba an Rue la Frauga, que era tiu Manuel Çapateiro i mantenie la nomeada anque yá nun fura çapateiro; l outro moraba pa la punta de Camino Prado. Bárias pessonas de la rue me dezien: tiu Çapateiro ye judiu berdadeiro. Tamien l mais de la giente sabe que la redadeira oufecina de çapateiro de Sendin era de tiu Eduardo Lopes. Cuido que nun será demais dezir que l oufício de çapateiro nessas famílias yá puode benir al menos zde l seclo XVI.

Na segunda leba de l’Anquesiçon, 1667 a 1721, aparécen nomedas 36 pessonas cul oufício de çapateiro, habendo anhos speciales: an 1674 i an 1685 son nomeados nuobe i an 1678 son nomeados catorze. Eiqui quédan ls sous nomes:

António Fernandes

Antonio Loppes

António Luís Portilho

António Rodrigues, o velho

Balthezar Fernandes

Belchior Lopes

Belchior Rodrigues Loppes

Bernardo Cardozo

Christovão Fernandes

Diogo Rodrigues

Domingos Crasto

Domingos de Castro

Estevam Fernandes

Felipe de Castro

Felipe Rodrigues

Francisco Fernandes

Francisco Henriques

Francisco Pires

Joam Fernandes

José Henriques

Luís de Castro

Manoel Dias

Manoel Gonsalves

Manoel Martins

Manuel Cardozo

Manuel Dias

Manuel Gabriel

Manuel Gomes

Manuel Gonçalves

Manuel Henriques

Manuel Henriques Carção

Manuel Martins

Martinho Fernandes

Pedro Dias

Pedro Fernandes

Pedro Pires

Cumo puode ber-se, uito deilhes ténen l apelhido Fernandes i trés ténen l apelhido Lopes, possiblemente cuntinando un oufício que yá era de família. Mas hai outros nomes que inda hoije cuntínan an Sendin, cumo ls Cardosos, ls Castros, ls Grabieles, ls Gunçalbes, ls Martinzes, ls Carçones i outros.

Se quejirmos saber quantos çapateiros habie an Sendin, al menos an ciertos anhos, podemos chegar a un númaro ampressionante, que andarie antre l 10% i l 15% de ls homes an eidade de trabalhar. Chego a esse númaro cuntando ls 14 çapateiros que las listas dan pa l anho de 1678, númaro esse que talbeç chegasse als binte se tubírmos an cuonta que nien todos aparecerien nas listas i cuntando que Sendin tenerie por essa altura arrimado a uns 200 fuogos.

Inda cien anhos apuis, an 1796, hai an Sendin 14 çapateiros, cuntinando a ser l oufício cun mais giente, sien cuntarmos ls lhabradores. Nessa altura Sendin tenie 244 fuogos l que dá arrimado a 7% de ls homes an eidade de trabalhar (ber José Maria Amado Mendes, Trás-os-Montes nos fins do século XVIII, segundo um manuscrito de 1796, ed. Fundação Calouste Gulbenkian e Junta Nacional de Investigação Científica, 2ª edição, 1995).

Yá ne l ampeço segunda metade de ls seclo XX, antre las oufecinas de tiu Eduardo Lopes i la de tiu Gamboua i alguns andebiduales, habie an Sendin arrimado a cinquenta çapateiros.

2. Cumo podemos ber, las listas de l’Anquesiçon ajúdan-mos a cuncluir que l oufício de çapateiro fui l mais amportante de Sendin, al menos al lhargo de ls redadeiros 400 ou 500 anhos: por junto, son nomeados 47 çapateiros. Hai trés perguntas que spéran por repuosta: porquei habie tanto çapateiro an Sendin? Adonde habie giente que dira trabalho a tanto çapateiro? Adonde iba tanto çapateiro a saber de l cuiro para fazer tanto çapato? Bou a dar la mie repuosta cunsante ls dados que tengo.

Ls çapateiros de Sendin serien giente sien tierra ou cun pouca tierra, debido a nunca la habéren tubido ou por la habéren perdido an ampeinhos. Quanto als que nun tenien tierra habie de ser giente que bieno de fuora, scamugida de outros lados cun ua mano alantre i outra atrás. Ye possible que un ou outro haba recebido alguns arachales cula çtribuiçon de maninhos an 1521, mas tamien ye possible que outros hában benido apuis dessa era i nun recebíran nada, inda porriba benindo de fuora. Mas este ye un porblema a zambolber quando tratarmos doutros oufícios.

Cuido que ls çapateiros de Sendin nun tenien todos trabalho an Sendin i an to l anho, até porque muita giente andarie çcalça. Criou-se la questume, que durou até al seclo XX, de s’ajuntáren als grupos de dous ou trés i íren pulas aldés alredror a rogar l trabalho. Ende quedában a drumir i a comer ls dies neçairos para fazer ou remendar ls çapatos pa to l anho. Era giente probe que lebaba la pouca ferramienta a las cuostas, mas ls materiales era l amo que los mercaba cunsante la sue percison. Cuido que esta questume haberá ampeçado ende pul seclo XVI. Hai que tener an cuonta que ls çapateiros nun fazien solo çapatos de toda la culidade, mas tamien purparában ls arreios pa ls animales i fazien cholas, albarcas i cousas aparecidas. Mas hai que acrecentar inda dues cousas: essa giente biu bien que esse un ramo an que haberie muita falta i eilhes splorórun-lo bien pa ganhar la bida; ls çapateiros sendineses, por muitos cientos de anhos, calçórun meia Tierra de Miranda.

L cuiro perciso pa l trabalho de ls çapateiros benie de las Teneries, adonde se curtien las pieles. Habie dues teneries an Sendin, mas tamien habie teneries amportantes an Bempuosta, an Belharino de ls Galhegos i an Miranda, assi cumo an Fermeseilhe, de l outro lado de l riu, esto se nun cuntarmos cun Bumioso, Carção i Argoselo. Era dessas andústrias de tenerie que benie l cuiro. Un die destes falarei de las dues Teneries (i de l’andústria de l cuiro) de Sendin, que quedaba ua antre rue la Frauga i la Fuonte de l Lugar i outra quedaba por baixo de la Fuonte de l Lugar, assunto que yá fui studado por Carlos Ferreira.

3. Nun sabemos la rezon de tanta perseguiçon als çapateiros sendineses, sien purmeiro habermos lido todos ls decumientos de ls porcessos de l’Anquesiçon. Mas nun ye defícele manginar que pessonas benidas de fuora i que se coincien mal serien mais fáceles de denunciar i tamien trairien cun eilhes la fama, berdadeira ou nó, de cristianos nuobos que possiblemente los oubrigou a salíren de las sues tierras. La berdade ye que bárias pessonas son apersentadas nas listas de Sendin cumo cristianos nuobos, quier dezir, judius ou decedientes de judius que se habien cumbertido a la relegion cristiana. Esse sistema de denúncias era lucitado nas Custituiçones de ls bispos i nas práticas de ls curas, ourganizando-se berdadeiras campanhas de denúncias.

Tamien hai que tener an cuonta que giente de fuora criaba ua cierta presson an relaçon al aporbeitamiento de ls recursos scassos i esso nun serie bisto cun buns uolhos, yá que daba ourige a roubos i outras práticas cundanadas pula quemunidade.

4. Para acabar estas cúrtias notas, nun puodo deixar de chamar l’atençon, mais ua beç, pa l’amportança de ls çapateiros na stória de Sendin, na sue eiquenomie i na sue cultura. Hoije puode-se dezir que yá zaparecírun, tan poucos son ls sous repersentantes a trabalhar nesse ramo. Assi i todo inda ye cousa que stá mui biba na lhembráncia de muitos homes que fúrun çapateiros i trocórun esse oufício pula eimigraçon, derrotados puls çapatos de feira feitos an fábrica. Cun eilhes inda haberá muitas de las ferramientas que ousórun. Serie ua pena que todo esse património se perdira, apagando mais essa mimória de Sendin. Pa que las cousas nun se pássen desse modo cuido que ye tiempo de ourganizar un pequeinho Museu de l Çapateiro, adonde s’ajunte anformaçon subre essa giente, subre ls sous porcessos de fabrico, las ferramientas que ousában, ls materiales que fazien i las cuontas que inda muitos deilhes repíten. Eiqui queda l’eideia para quien la pudir agarrar, sabendo you que ua parte amportante de l’oufecina de tiu Eduardo Lopes inda stá cunserbada. Squecer ls que mos fazírun, mais que cousa de giente mal agradecida, ye meicamino para nun saber quien somos i porque somos assi. Lembrar ye un deber de cidadanos an relaçon al nuosso património.

Deixo estas notas a modo de houmenaige als çapateiros de Sendin, al muito que tubírun que sufrir al largo de seclos, al modo cumo eilhes reperséntan la luita pula bida que ye bien caratelística de ls sendineses, caratelística essa que se fui fraugando al largo dua stória de muitos anhos i de muito penar. Outra cousa nun poderie fazer, sendo tamien you filho de çapateiro.

Amadeu Ferreira

Abiso:

Este testo, cunsante las regras de la Cumbençon Ourtográfica de la Lhéngua Mirandesa i de la sue Purmeira Adenda, stá solo screbido cun L- an percípio de palabra, a la moda de l mirandés de Sendin.