Scrita i assentos

Bamos a tratar de alguns casos de scrita, anque puodan ser tratados noutras perspetibas. Las listas de palabras que son apersentadas nun son cumpletas, mas a modo de eisemplos.

L prefixo mirandés z- corresponde al pertués des-. An ciertos casos, aquel prefixo diç-se ç-

Usa-se la mesma scrita mesmo an casos an que nun se puode dezir que aquel ampeço seia un prefixo.

- L prefixo z- scribe-se antes de bogal ou de las cunsonantes b, d, g, l [lh], m, n, r.

- L prefixo z- diç-se i scribe-se ç- antes de las cunsonantes c, f, p, q, s, t.

- Tamien las palabras ampeçadas por dis- an pertués, se scríben an mirandés cun ç-

- Las palabras ampeçadas por di- [que, an mirandés, l mais de las bezes, se diç de-] ou de-, se scríben cun ç-, ousando-se ende mais las dues formas cumo an çclarar / declarar, çfamar / defamar, çfender / defender, çfrente / defrente, çfrençar / defrençar.

- Casos speciales

Palabras an que mesmo nun aparecendo nanhun prefixo des- la simpres perséncia desse grupo lhieba a que se diga z-, anque se puodan ousar las dues formas:

desde > zde

desde que > çque / deç que

desde inda > zinda / zdinda

despuis / depuis / adeqpuis > çpuis

La forma es- átona nunca se usa an mirandés an ampeço de palabra, mas solo s-

Nota: ls solos casos que eisísten an mirandés ampeçadas por es- tónico, son ls seguintes: esse, essa, esso, esta este, esto.

La scrita de an- i am- an ampeço de palabra

An mirandés nun hai palabras ampeçadas por en- i em- ou in- i im- átonos i antes de cunsonante, yá que todas essas palabras ampéçan por an-.

Ls eisemplos dados a seguir, solo por mais facelidade de antendimiento, tóman l pertués cumo termo de acumparança.

- Palabras que ampéçan por en- em- átono an pertués i por an- an mirandés:

Un bun eisemplo ye l berbo antrar que demuda la scrita cunsante la sílaba d’ampeço seia tónica ou átona.

Persente de l andicatibo: entro, entras, entra, antramos, antrais, éntran.

- Palabras que ampéçan por in- ou im- átono an pertués i por an- an mirandés:

Un bun eisemplo ye l berbo anchir que demuda la scrita cunsante la sílaba d’ampeço seia tónica ou átona:

Persente de l andicatibo: incho, inches, inche, anchimos, anchis, ínchen.

Ditungaçon an ei-, an ampeço de palabra

An mirandés nun hai palabras ampeçadas por e- ou i- átonos, yá que todas essas palabras ditóngan an ei-

- Palabras ampeçadas por e- [ou he-] átono:

- Palabras ampeçadas por i- átono:

Hai algues palabras que admíten dues formas:

eibangeilho ou abangeilho;

eimbierno ou ambierno;

einfierno ou anfierno;

eirmita ou armita;

eirrar ou arrar;

eiterno ou aterno.

Ditungaçon an ou-, an ampeço de palabra

An mirandés nun hai palabras ampeçadas por o-, u- i eu- átonos, yá que todas essas palabras ditóngan an ou-

- Palabras ampeçadas por por o- [ou ho-]átono

Destes casos cuido que debe de quedar de fuora la palabra hotel [inda que se diga houtel], yá que ye a modo ua palabra ounibersal.

- Palabras ampeçadas por o- [hon-, om-, on-]i u [un-] nazal átono, inda que Neste casos tamien se use la scrita sien ditungaçon

- Palabras ampeçadas por u- [ou hu-]átono

- Palabras ampeçadas por eu- átono

Las palabras ampeçadas por au- átono, an regra ditóngan an ou-

Destes causos cuido que dében de quedar de fuora todos ls cumpuostos de la palabra auga, yá que todos manténen un assento secundairo que acunseilha a mantener la scrita cun au-: augachado, augachal, augaçada, augadeira, augadielha, augado, augamiento, augar, augardiente, augarielha, augarito, augarraç, augazileiro, augueira.

Nas palabras ampeçadas por ui- átono tenemos ls seguintes casos

18 de Nobembre de 2006

Amadeu Ferreira

La Cumbençon Ourtográfica de la Lhéngua Mirandesa trata de ls assentos nas páiginas 26-27. Ende stá dezido l eissencial, que eiqui bamos a seguir. Mas houbo algues modeficaçones cula Purmeira Adenda, quanto a la fin de l assento circunflexo ne ls ditongos crecientes, que eiqui tenemos de lhebar an cuonta.

Esta licion resulta de l que se diç na Cumbençon cul que se dixo apuis na sue Purmeira Adenda. Assi i todo, cuido que hai causos que merecien nuobo studo i mais zambolbida seluçon. Dende que alguns de ls causos que eiqui bou a deixar mais séian un nuobo punto de salida para repuostas mais adelantradas que un die puodan ser çcutidas.

1. Assentos i outros sinales gráficos an mirandés

An mirandés solo s’usa l assento agudo ´.

Puode-se ousar tamien l til ~ cumo marca gráfica, mas solo cula sequéncia ũa, nas palabras ũa, algũa, dũa, ningũa, niũa.

La Cumbençon Ourtográfica de la Lhéngua Mirandesa, tenendo an cuonta que l ~ nun aparece porriba la letra u ne ls botones de ls cumputadores, aceitou que se screbira sien ~. Assi, la scrita deste sinal depende de cada pessona.

Apuis de la Purmeira Adenda a la Cumbençon Ourtográfica de la Lhéngua Mirandesa nun hai palabras cun assento circunflexo ^ [que era ua marca gráfica de bogal cerrada]. Anque haba zaparecido esse sinal, las segundas bogales de ls ditongos crecientes ie i uo, nas tierras adonde se dízen, cuntínan a ser cerradas.

2. Percípios subre l’assentuaçon an mirandés

La Cumbençon Outográfica de la Lhéngua Mirandesa pon trés ourientaçones percipales quanto a l’assentuaçon:

- reduzir ls assentos al mínimo;

- quedar lhougo a saber qual ye la sílaba tónica;

- quedar a saber la bogal tónica.

3. Regras de assentuaçon an mirandés

3.1. Ténen assento las palabras agudas [que ténen cumo tónica la última sílaba] acabadas an –a(s), -e(s), -o(s).

Aperséntan-se a seguir listas de eisemplos de cada un desses causos.

- Palabras agudas acabadas an -a(s):

- á, acá, acolhá, además, atrás, bá, bichá, dá, datrás, há, lhebará, más, muitá, oulá, ouxalá, quantá, trás, trés, yá, xetá.

A esta lista tenemos que acrecentar las formas berbales de l feturo de l andicatibo, na 2ª i 3ª pessonas de l singular, i algues formas de la cunjugaçon pornominal. Eis.: lebarás, lhebará; screbirás, screbirá; scolherás, scolherá; lhebá-lo, sacá-lo.

Eiceçones: monossílabos que nun séian tónicos nun lhieban assento: a, la(s), na(s), pa, pra.

- Palabras agudas acabadas an -e(s):

- abecé, aldé, alrobés, anglés, arnés, arreché, assemblé, barranqués, café, haré, cinués, Einés, fé, fragués, goulés, Jesé, lhionés, més, mirandés, pedrés, pertués, rés, rolés, saiagués, scalhabrés, sendinés, terruntés, tremés, trés.

Bárias formas berbales síguen la mesma regra: dé, tené-lo.

Eiceçones: monossílabos que nun séian tónicos nun lhieban assento: çque, de, le(s), me, ne, que, se, te, zde.

- Palabras agudas acabadas an -o(s):

- abó, belhó, bó, bós, ló, nó, nós, oulhó, robó, senó, só, sós, xó.

Eiceçones: monossílabos que nun séian tónicos nun lhieban assento: bos, lo(s), mos, no(s)

3.2. Ténen assento las palabras grabes [que ténen cumo tónica la penúltima sílaba] acabadas an –ç, –r, -n. Estes causos son eiceçones a la regra 6, yá que la palabras que acában desse modo son quaijeque siempre agudas. Por esso, ls eisemplos son mui poucos, i you solo çcubri ls que stan a seguir, quanto a palabras acabadas an -ç i an -r:

- palabras acabadas an –ç: lápeç;

- palabras acabadas an –r: cárter, néctar;

- palabras acabadas an –n: álbun, ámen, ampécen, cánten, póngan... i muitas formas de la terceira pessona de l plural de alguns tiempos berbales].

3.3. Ténen siempre assento las palabras sdrúxulas [que ténen cumo tónica la antepenúltima sílaba] afuora ls causos an que la tónica seia un ditongo creciente –ie- i -uo-.

- águila, almorródia, ambálido, áncora, anfáncia, ansénsio, anúncio, anxúndia, bágamo, baláncio, bárrio, batifúndio, bózio, brício, bárdio, bérrio, béstia, bóbeda/bóbida, cántara, carátele, cencérria, cúmio, cuncéncia, cúscaro, çprézio, décima, defénsia, defícele, defréncia, díbeda, dóndio, dúbeda, dúnia, einútele, eipístola, eisército, einútele, eitália, fácele, falhéncia, fário, fedúcia, gábia, gáçpia, ganáncia, géstio, grácia, íntemo, Júnio, justícia, lhéngua, lhúria, márcio, mantenéncia, matáncia, mazmárria, nacéncia, nérbio, oudácia, óndia, ouiditório, pítula, porbíncia, précio, príncepe, próssimo, rábia, sámbano, séstia, sítio, slúbio, trúbio.

3.4. Anque la Cumbençon Ourtográfica nun fale deilhes, hai que çtinguir na scrita ls causos an que dues bogales seguidas nun fórman ditongo. Para esso cuido que l melhor ye poner un assento nas bogales –e- –i- i –u- tónicas quando nun fórman ditongo cula bogal que stá atrás:

- adaínha, bruído, buí [de l berbo buer, çtinto de bui, animal] caí, caída, çtraído, juíç, juízo, ladaínha, perjuízo; an general muito partecípios passados: çcaído, çtruído, derruído;

- biéç, diéta i fiél [çtinto de fiel, uorgano de l cuorpo];

- biúbo/biúdo.

3.5. Nun lhieban assento las palabras, séian agudas, grabes ou sdrúxulas, an que la sílaba tónica ye l dítongo creciente –ie-, i –uo- [ber eisemplos an 4.1., 4.2. i 4.3., de la licion a seguir].

3.6.Nun lhieban assento las palabras agudas acabadas an –ç, -r, -l, -n, -i(s), -u(s), -ie(s), -ue(s) [ber eisemplos 4.1., de la licion a seguir].

3.7. Nun lhieban assento las palabras grabes acabadas an a(s), e(s), o(s) [ber 4.2., de la licion a seguir].

21 de Márcio de 2007

Amadeu Ferreira

(cuntinaçon de la licion 019)

4. Cumo saber adonde stá la sílaba / bogal tónica an mirandés

4.1. Las palabras acabadas an –ç, -r, -l, -n, -i(s), -u(s), -ie(s), -ue(s) ténen cumo tónica la última sílaba – palabras agudas -, afuora ls causos de 3.2.

Aperséntan-se a seguir listas de eisemplos de cada un desses causos.

- Palabras acabadas an -ç:

acideç, alferç, algoç, ambalhideç, amperatriç, ancapaç, andaluç, aniç, arroç, atroç, beç, belheç, berniç, biubeç, boç, calantriç, capaç, cartaç, chafariç, cherriç, cruç, dieç, drobeç, dunzelheç, dureç, eificaç, faroç, Felç, felhoç, feliç, gaç, giç, goraç, hounradeç, Infainç, juiç, lhuç, madureç, matriç, menineç, nariç, nineç, nuoç, oudaç, ougarraç/augarraç, paç, paçpalhaç, paiç, peç, Perç, perdiç, Pirç, prenheç, raiç, rapaç, rascapeç, talbeç, teç, urç, xadreç, xiç.

L mesmo bal pa las formas berbables que acában an –ç, cumo diç i fiç.

- Palabras acabadas an -r:

abenir, acusador, alcacer/alcacel, alredror, amor, anferior, arador, balor, bendimador calor, cantador, colher, delor, doutor, fabor, falador, lhabrador, lhar, maior, mulhier, mundador, oulor, oupor, outor, palumbar, pecador, pior, por, porsor, reissenhor, segador, senhor, smoler, superior, telar, tenedor, trabalhador.

L mesmo bal pa las formas berbales acabadas an –r: todos ls anfenitibos ampessonales i la 1ª pessona de l singular de l anfenitibo pessonal i de l feturo de l cunjuntibo.

- Palabras acabadas an -l:

abelhanal, abril, adil, al, alhal, almendral, andebidual, anfernal, anfiel, animal, antestinal, anzuol, aquel, arachal, arzinal, atual, azul, batismal, berdial, bogal, bornal, cabanhal, canal, candial, candil, canhal, caracol, carcanhal, carril, cebil, cordel, creminal, cultural, cumbibial, çtrital, daquel, debinal, del, dunzel, eidial, eigual, eileitoral, eimortal, eissencial, el, fardel, frol, funil, gabelhal, gentil, global, lhibaral, lhagrimal, lhençol, lial, machinal, maçanal, maioral, mal, mandil, marfil, miel, mil, muradal, nabiçal, nacional, natural, nel, nial, normal, oubal, oufecial, oural, oureginal, oulhal, outibal, outonhal, papel, pardal, pascoal, personal, piel, pinheiral, pul, pula, regional, Sabel, sal, semanal, sexual, social, sol, spanhol, special, tal, testual, zeigual.

- Palabras acabadas an -n:

acabaran, abiaçon, açadon, açafran, acupaçon, acusaçon, agrelhon, aldrujon, algun, alicran, alperchin, anjaçon, anton, antreten, atun, baron, bedun, Belen, bien, binten, boucin, cachachin, capitan, carreiron, claron, coraçon, cumben, carreiron, chinchin, colharin, çarafin, deboçon, dragon, dun, duracion, ferrian, ferron, fertun, figuron, fin, fincon, formon, foucin, fulhin, gabelhon, gabilan, galan, galardon, galaton, guardian, jardin, Jarusalen, lhatin, lhion, marcacion, maron, mastin, mirandun, mulon, munton, nien, niun, ouraçon ourientaçon, pan, peciçon, perdigon, pimpin, pimpon, precion, quemun, quinan, rachon, renhon, ruin, san, Santaren, sartian, scarranchin, sertun, tan, ten, un.

-Palabras acabadas an -i(s) [ou an -ai(s), -ei(s), -oi(s), -ui(s)]:

– i(s): assi, dalhi/deilhi, eilhi, aqui/eiqui, daqui/deiqui, mi, oubi, porqui, puli/pulhi, rui, si, ti;

– ai(s):andai, carai, mai, pai;

- ei(s):delei, dirreis, lei, porquei, rei;

- oi(s): caboi, cascaboi, heiroi;

– ui(s): adepuis, apuis, bui, çpuis, mui, rui.

Eiqui cáben tamien las formas berbales acabadas an –i: comi, cantai, amei, fui, etc.

- Palabras acabadas an -u [-au (s), eu(s), -iu (s), -ou (s)]

- u(s): baju, bru, caju, çu, peru, pus, tu, baju.

- au(s): bacalhau, bau, calhau, Charrau, degrau, gau-gau, lhafrau, quinau,

- iu(s):adius, algarbiu, calafriu, dius, fastiu, feitiu, fetiu, friu, gentiu, judiu, miu, nabiu, niu, riu, selumbriu, senhoriu, tiu. I las formas berbales acabadas an -iu-

- eu(s) – ateu, berceu, beu, camafeu, chapeu, fideu, heibreu, ouropeu, pigmeu.

- ou(s): dous, ou, sou, tou, you, amou, belou, cantou... I outras formas berbales assi acabadas an –ou.

- Palabras acabadas an -ie(s):

– abadie, abarie, abemarie, alegrie, alergie, algarbie, die, anfermarie, bacie, balancie, cuntapie, einergie, fantesie, judie, lotarie, magie, maiorie, Marie, mie, pie, selumbrie, senhorie, strepie, tenerie, tie.

Todas las formas berbales acabadas an -ie-, de l amperfeito de l andicatibo i de l cundicional. Eis.: amarie, darie, screbie, screbirie, ponie, ponerie, tenie, tenerie.

- Palabras acabadas an -ue(s):

- algue, dues, nanhue, rue, sue, tue.

4.2 – Ténen cumo tónica la penúltima sílaba – palabras grabes -, las palabras ende assentuadas [ber 3.2.] i inda:

- palabras grabes acabadas an a(s), e(s), o(s), a nun ser que téngan assento noutra sílaba:

- able, aceinho, acerca, acre, aila, aigla, açucre, agre, aire, ala, andeble, antre, anxame, apeias, auga, baca, beche, benairo, biaige, brime, caçurro, camboio, camino, campanairo, canhiça, canho, cenceinho, cunda, çafra, çamorano, çanchina, çanco, çapato, çaranda, çcalço, çcarga, çcriçon, çcuçon, çcuido, çculpa, çcurso, çfeito, çforra, çoco, çpacho, çparate, çpoijo, çquila, çubiaco, çumo, çupapo, çuquete, çurriago, dantes, debrebe, deble, deimingo, dende, deseio, diabro, dino, dito, doble, dosa, doutrina, dreita, dreito, drento, egre, eibado, eidade, eigreija, eilha, eilhes, eilustre, eimaige, eimoble, einauga, eipopeia, eiquipa, eirmita, eisame, eisemplo, eiternidade, eiterno, eixe, ende, esso, esto, faba, faceira, falhisca, faquita, fermoso, ferruge, filo, finolho, fixa, fogaça, foia, folhaige, fraile, frezno, friura, froixo, furco, galhina, garabato, garaige, garbanço, garunhas, geriboila, gorra, gralho, grilho, guapo, guedeilha, guincha, guira, gusto, heireije, hoije, heiroico, home, houmano, hourrible, inda, ingre, isso, isto, jaleco, jinela, jogo, junta, juntouro, jura, lhaço, lhado, lhadronaige, lhama, lhana, lhargo, lheira, lheuga, lhienço, lhibro, lhino, lhuna, lunjura, maça, maçana, madrina, maleitas, malina, malzina, mandilete, manha, manhuço, mano, manolho, maquila, marrana, mauga, medonco, mensaige, molino, mona, mora, miles, mofo, moreno, moucho, munha, naide, nalga, narça, nembro, nubre, nubrada, nubrina, nuite, ouca, ouxado, pala, palabra, palo, palomba, pana, panho, parba, peco, peine, peinha, pelaige, pelo, penca, perro, pila, pocho, probe, queiso, quiço, raba, racha, raia, ralo, rana, ranco, raposa, rebo, reilha, reina, relica, releixe, reloijo, remolino, rodo, rojura, rosairo, runquido, sano, salude, sanja, sarta, sartigalho, sbalido, scapada, scarabanada, scarranchas, scoba, seclo, seno, senreira, serano, sgoda, sgueilha, silbote, smola, soto, spalda, speto, spina, spinaço, spineiro, squadrie, squila, squineira, staca, stada, stadulho, strada, stube, stuque, taxe, uba, uito, xabon, xara, xefe, xordo, zambunho, zinolhada, zinolho.

- palabras que téngan ls ditongos –ie- i –uo- na penúltima sílaba:

- abierto, alguien, amarielho, andependiente, anhiego, anielho, antierro, ariesta, augardiente, azariego, bacielho, baliente, beraniego, bielho, bien, bienbenido, bieldre, biendo, bientre, biespera, boubielha, burrieça, caliente, canielha, capielha, carrielho, castielho, ciego, cielo, ciento, cierto, corriente, costielha, dieç, diente, duzientos, eimbierno, fazienda, ferramienta, fierro, fiesta, giente, grieta, lhiebre, lhienda, lhiendre, maçanielha, maçcarielha, manielha, martielho, miedo, miel, mielgo, mierla, morcielha, mulhier, niebe, niebro, nieto, nobielho, oufierta, ourielho, ourdebielha, ourielho, ourrieta, paniego, parabienes, patrielhas, pertendiente, pieça, piedra, piel, pierna, portielho, pumiento, qualquiera, quieto, quien, quienquiera, quetobielho, rabadielha, rebielho, reciente, relhuziente, renozielha, riestra, rodielho, semiente, sequiera, siempre, sienes, sierra, siete, spadielha, sparrielha, squierda, tamien, tarabielho, teniente, tenrielha, termienta, tiempo, tienda, tienro, tierra, tiesta, trezientos, zanquieto;

- almuorço, ambuolto, ampuosto, ancuolhas, antruolhos, biuola, biruolho, buolta, buono, buosso, buosta, cachuola, caçuola, carniçuolo, carriuola, castanhuolas, chuobe, chuoco, ciguonha, cumpuorta, cuolho, cuolmo, cuonta, cuorbo, cuorda, cuorno, cuosta, çpuosto, çuola, duolo, duonho, fuogo, fuolha, fuolhe, fuonte, fuora, fuorça, fuoro, fuorte, guola, huorta, huorto, muola, muolde, muolo, muordo, muormas, muorte, muorto, muostra, nuobe, nuobo, nuoç, nuolo, nuora, nuosso, perpuosta, pessupuosto, Pruoba, puolo, puonte, puorco, puorta, puorto, puosse, puosta, puosto, queluobra, raiuola, rebuolta, recuolha, renuobo, repuosta, resfuolgo, ruoca, ruodra, Ruolos, scuola, scuolha, sfuorço, spiruolho, subrepuosto, suogro, suola, suolo, suolto, suonho, suorte, triçuolho, triuola, truono, tuoro, tuorto, tuosse, uobo, uoco, uoçca, uolho, uolmo, uosso, zambuolto.

4.3. Ténen cumo tónica la antepenúltima sílaba – palabras sdrúxulas -, las palabras cun assento nessa sílaba [ber 3.3.] i inda:

- las palabras que téngan ls ditongos –ie- i –uo- na antepenúltima sílaba:

- biespera, morciegano, niebeda, ouriegano. I bárias formas berbales de alguns berbos cumo lhiebemos.

- huospedo, uorfano, uorgano. I bárias formas berbales de alguns berbos cumo puodamos.

30 de Márcio de 2007

Amadeu Ferreira