Onte, die 28, la Olivícola Sendinense fizo ua reunion para tratar de la nuoba campanha de l azeite. Yá fúrun sorteados ls númaros, para saber la orde por que cada un bai a fazer l azeite. Este anho ye por númaro de orde i cada un ten que saber quando l chega la beç.
La Olibícola del lhado de la frente
La Olibícola del lhado donde éntran las azeitunas
Solo hai riqueza se houbir produçon. Ye del trabalho que ben l que se cuolhe i ye dels produtos que ben l denheiro.
La Olíbicola i la Cooperatiba Ribadouro son dues anstituiçones que muito ajúdan ls agricultores.
Mas hai por ende ourganizaçones que bíben dels agricultores. I inda por riba tíran la deboçon a quien quier trabalhar.
La Cooperatiba Ribadouro
La Cooperatiba yá pagou la 2ª. prestaçon de las ubas. Ls que dórun l NIB ye ir a ber al banco ou a la caixa. Ls que inda nun l dórun ide a lhebantar ls cheques.
Por cuonta de las deste anho yá podeis lhebar produtos drento de dies.
Solo un abiso, nun bos deixeis anganhar por quien solo quier fazer mal. Anformai-bos cun quien sabe i nó cun doutores de la praça.
