Muito se fala an turismo, mas la maior parte de las bezes nun se splica bien l que se quier cul turismo i l que podemos ouferecer.
Para tenermos un turismo çfrente i que puoda cumpetir cun ls outros, tenemos que tener eimaginaçon. La nuossa comida i ls nuossos produtos tamien son un modo de fazer cun que béngan turistas. Yá hoije muitos bénen por comer i por lebar l nuosso bino, l nuosso azeite, la nuossa chicha, l nuosso pan, las nuossas azeitunas, l nuosso fumeiro i sei alhá quantas cousas mais.
L forno cheno
Inda hai muita giente an Sendin, que amassa i que faç, desse die, un die çfrente. Neste fin de semana acumpanhei un die desses i se esso fusse ouferecido cumo un die turístico, cuido que tenerie giente a partecipar.
Yá pensestes an ouferecer a grupos turísticos, un die para comer un bun assado ne l forno i poder ber al bibo cumo se faç?
Mirai bien para l que hai drento de l forno
L pan, que ye tal qual cumo l de toda la bida. Un pernil i un cacho de bitela nua trabiesssa i la cebolha assada para l almuorço. La bolha-doce i outros doces, para apuis de l’almuorço i para la tarde. Ls bolhos para ls garoticos que stán cun siete uolhos a ber quando tíran l pan de l forno.
Ls bolhos para ls garoticos
Siempre que se amassaba i inda hoije, por aqueilho que se bei, tamien se fázen ls bolhos para dar als garoticos.
Quando entro sin ser perciso chamar, ye ua cousa que me faç cuntinar cun l HOIJE . L modo cumo me recíben an todo l lado, bal mais que todo l denheiro que podira ganhar.
- Ah! Tiu Almendra, bien podiedes tener dito que beniedes. (Trátan-me por srº. porsor, mas se liebo la máquina de ls retratos yá sou tiu Almendra).
- Se bos abisasse yá nun tenie grácia nenhue.
- Mas las patatas tenien que ser assadas cun la casca, no borralho, na boca de l forno…
-Ye berdade, mas hoije ye solo para mostrar que inda se cuoze pan. Para la outra beç, fazeis tamien ls chamuscada. (Bolha de massa, spalmada i mal amassada, que se crestaba subre las brasas a la boca de l forno).
- Inda se lembra desso?
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
