Cumo todos ls anhos na Sesta-feira antes de l antruoido, las nuossas scuolas fázen, cun ls alunos, l antruoido, pulas rues de Sendin.
L hoije acumpanhou todo i tirou ls retratos de ls alunos zde ls de la anfantil até ls de l ciclo.
Todos ls retratos stán ne l sitio de ls retratos i podeis ir a ber-los. Son três páginas. Eiqui bou a poner solo nuobe i cuido que móstran l percipal.
Mirai que lindos íban ls de la anfantil
Ls de la primária retratában bárias situaçones, la primeira ye subre un curso de cozina para nun fazéren las cousas mal, se nó tenien que se haber cun la ASAE.
Ls de l curso de cozina
A seguir ls que mostrában ls comeres buonos para la salude
Estes móstran la ruoda de ls pordutos de comer
I estes la laboura biológica
A seguir benien ls de l ciclo cun lindas coreografies, parcie mesmo l antruoido de l Brasil.
Lindo retrato
Mirai bien para la fileira cumo ye de grande
Apuis de dáren la buolta até al Baiunco, yá na praça, fui ua alegrie para la giente que se juntou a ber. Sendin ye mesmo ua tierra cun giente de balor, nun son solo dous ou três, ye muita giente cun balor, se nó, cumo era possible fazer esto? Para todos ls porsores, pais, ampregados i alunos un muito oubrigado.
La fileira iba zde l Sagrado al meio de l Baiunco
Para ancerrar íban ls maiores de l ciclo, aqueilhes que ándan ne l ultimo anho. Tal cumo fázen, na queima de las fitas, ls studantes, tamien eilhes lebában l letreiro de “ finalistas ”.
Parcíen mesmo un grupo de finalistas
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
