L bento i la chuba fúrun fuortes an todo l Norte de Pertual i Sendin nun scapou. Fui un die de gordo sin la animaçon de outros anhos yá que nun se puode fazer ningua maçcarilhada.
Mesmo l jogo de bola fui mui cumplicado i poderie tener sido un grande jogo, puis la melhor eiquipa de l campeonato bino a Sendin.
Las eiquipas a porparar-se para ampeçáren l jogo
Cumo se puode ber, l campo staba cheno d’auga, durante 15 minutos inda chubiu pouco l que dou para se jogar mais ou menos, mas nun sfregante quedou cumo se fusse de nuite. Fui l momento para la eiquipa de Mãe-D’agua marcar l purmeiro golo yá que tenie jogadores mais fuortes i sprientes.
Mirai bien cumo quedou l tiempo
L jogo nun fui anterrumpido, cumo acunteciu an outros jogos de l Strital de la AFB, porque l nuosso campo ten eiluminaçon. Acendiu-se la eiluminaçon i ls nuossos jogadores fazírun de las tripas coraçon i ampatórun.
L campo yá eiluminado
Ls nuossos jogadores a abraçar-se apuis de l golo
Bieno la segunda parte i l campo cada beç iba quedando mais pesado i fui esso que fizo la çfrencia, ls jogadores mais fuortes acabórun por marcar outro golo. Mas, ls nuossos, todo fazírun para nun perder, mas l resultado acabou an 1-2.
Sendin - 1
Mãe D'Água - 2
L ultimo sforço de l Sendin
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
