Este ye l nono anho que se faç l festibal de sabores mirandeses, an Miranda.
Ye ua cousa mui amportante para l turismo i para mostrar ls nuossos pordutos. Quaije todas las aldés ténen algue cousa, quier seia de comer, quier seia de artesanato, para mostrar ou bender. Sendin stá siempre presente an todo i la maior parte de las bezes cun mais que ls outros.
L sitio de l bino i de l’azeite
L bino i l’azeite son dous de ls pordutos que mais se bénden i que mais son porcurados por ls turistas. Mas inda ten que se fazer ua maior porpaganda.
L fumeiro sendinés
L nuosso fumeiro tamien ten muita porcura i la fama ye tanta ou mais que la de ls melhores de Pertual. Mirai para l retrato que ben a seguir, parece que mos stá a cumbidar para l comer.
L sitio de ls doces
Outra cousa que ls sendineses fázen i lieban son ls doces de todas las culidades. Ls eiquenómicos, ls de l canto de la masseira, la bola doce, las cabacas, las rosquilhas i muitos mais.
Ls doces feitos an Sendin
An Sendin tamien se fázen facas artesanales i muito outro artesanato que hai que mostrar mais, porque muita giente nin sequiera sabe desso.
Las facas de Sendin
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
