Onte fui l die de l çfile de antruido an Sendin i cumo todos ls anhos fui mui lindo de ber. Para ls que quejiren ber todos ls retratos, ye ir al sitio de ls retratos que stán alhá ls de todas las rues que partecipórun i mais alguns.
A la nuite fizo-se l anterro i ye deste que bos falo hoije.
Ls fachuqueiros acesos
Las fileiras
Delantre íban dues fileiras de pessonas cun fachuqueiros acesos cumo se fazie quando nun habie luç i ne l meio las ties a chorar. Lougo a seguir benie l padre cun l missal na mano.
L padre cun l missal
Apuis benie l muorto, que nun ye mais que dous homes cun uas baras de la masseira als ombros indo eilhes ne l meio de las baras. L de trás liba la cabeça un pouco anclinada para trás para parcer la cabeça de l muorto i l de lantre segura dous sapatos que ban, un an cada puonta de las baras, para parcéren ls pies de l muorto.
L muorto
Para fazer l cuorpo de l muorto pónen-se uas mantas nas baras, que son cubiertas cun un lençol branco. Atrás de todos bai la giente que quier partecipar i que este anho fui bastante.
L giente que se ajuntou
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
