Onte a la nuite fui l baile de carnabal de ls mardomos de la fiesta de Santa Bárbela i cumo ye uso zde que you me lembre i yá passórun mais de 60 anhos, ende por la meia nuite hai l cuncurso de maçcarilhas. You cuncurri bárias bezes, mas desta beç tocou-me a fazer la reportage i fazer parte de l júri.
L que ganhou l 1º. Prémio de ls pequeinhos
L júri fui Aquilino Ginjo, Almendra, Cristina Martins, Palmira Peres i Teresa Boticário. Trés mulhieres i dous homes, que tubírun que scolher antre 13 cuncurrentes al prémio de ls maiores i 17 cuncurrentes al prémio de ls mais pequeinhos.
L que ganhou l 2º. Prémio de ls pequeinhos
Fui defícel scolher yá que todos merecien ganhar, nien que fura solo por la curaige de tenéren cuncurrido, mas tamien pul trabalho i la eimaginaçon para scolhéren l çfarce.
L júri inda pensou dar solo ls três purmeiros lugares, mas cumo habie muito prémio i nun éran eiguagles, mais trabalho tubo.
L que ganhou l 3º. Prémio de ls pequeinhos
Quanto als maiores fui mais fácele yá que éran menos i habie quaisque la metade cun maçcaras cumpradas l que lougo ls deixou para trás.
Las que ganhórun l 1º prémio
L purmeiro prémio fui fácele de dar yá éran un grupo de moças, que fazírun todos ls sous fatos por sues manos i la coreografie que eisibírun fui algo de lindo.
L que ganhou l 2º. Prémio
Este tamien fui merecido por bárias rezones. Era un home yá de ua cierta eidade i que mos trouxe la antiga figura de las ties bielhas sendinesas, que tanto trabalhórun, quando la bida nun era fácele i muitas bezes andando cun ls filhos a las cuostas i siempre trabalhando.
L que ganhou l 3º. Prémio
Fui l prémio a la alegrie i a la fiesta. L palhaço, mas sin maçcara, mas cun la cara bien pintada i que durante l cuncurso de ls pequeinhos, a muitos lebou por la mano i a todos animou cumo se fura un berdadeiro palhaço.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
