La Junta de Freguesie ampeçou las obras de alhargamento de l semitério. Apuis de muitas negociaçones, alhá cunseguiu cumprar l terreno i poucos meses apuis yá stan las obras a andar. Ye cun giente decedida que las cousas se fázen. Anquanto uns se preacúpan cun la politica outros trabálhan.
Las obras
Para fazer ua obra destas ye perciso muita fuorça de buntade i l trabalho de muita giente. Todos sabemos que l denheiro nun ye muito i ten que se saber ancuntrar modos de fazer las obras cun la ajuda de todos i cun eimaginaçon.
La compra de la máquina fui ua de las cousas buonas que esta junta yá fizo i ende stá a la bista la obra.
La piedra que la máquina yá ajuntou
Ls fanáticos de ls partidos todo ténen feito, an Sendin, para debedir la giente i las anstituiçones. Antre la Junta i la Câmara habie yá quien andasse a arranjar porblemas, mas ls que son mais por Sendin que por ls partidos bencírun. Un loubor a la Junta i a la Câmara, uns de l PS i outros de l PSD que ponírun l anteresse de Sendin antes de todo.
La máquina de la Junta a cargar l camion de la Câmara
La máquina ye de la Junta i ls camiones son de la Câmara. Todos a trabalhar por Sendin. I durante todo l die muita piedra bino para l semitério, de acerca de la marra de Ruolos, nas Casicas. L hoije stubo alhá.
L sitio de las Casicas
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
