Cuntinando a falar de la capielha, que ten muito que ber i cuntar, bou hoije a falar-bos de la tela que stá ne l’altar-mor. Ye ua pintura mui amportante de un pintor que se chamaba Manuel Furtado, andou pul Brasil i pintou tamien outro quadro que stá na eigreija de la Mesericórdia de Miranda.
La tela de Sendin representa la decida de l Senhor, de la cruç.
La pintura
La pintura faç parte de l retábulo de l altar-mor de la capielha. Mas l que ye mais curioso, ye que quando fazírun la talha de l altar, yá cuntában cun la pintura l que mostra l cuidado que houbo na construçon de la capielha.
L anjo de lado squierdo de l altar-mor
Quien mira para l altar-mor de cada lado, an riba, bei dous anjos cumo ls que stan ne ls retratos i muitas bezes la giente nun faç caso dessas cousas, mas se mirardes bien quedais cumo you quedei, ademirados.
L purmeiro retrato mostra un anjo cun ua cousa na mano. Mirai l outro.
L anjo de l lado dreito de l altar-mor
Cumo l retábulo mostra la decida de l Senhor, de la Cruç, ponírun un anjo cun uas truquesas i outro cun un martielho de oureilhas, na mano. Tenien acabado de arrancar ls crabos que prendien a Nuosso Senhor a la Cruç.
Manhana hai mais…
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
