Cuntinando a falar de la capielha teniemos que falar de l Senhor de la Buona-Muorte. Ye ua eimaige an talha de l seclo XVIII i de grande balor artístico i de ua grande beleza. Quando sal na percion de l die de sesta-feira santa, zde la sue capielha anté al semitério, ye ua cousa ampressionante. Ye ua de las perciones a que mais moços i moças ban.
Ye ua de las melhores cousas que debemos mostrar i que cun toda la certeza mais turistas puode traer.
L altar-mor
L Senhor de la Buona-Muorte
La capielha ye toda eilha un hino de loubor al sou Senhor. Anté las pinturas por riba de las puortas, mos móstran la Cruç apuis de que l decírun para l lebáren para la spultura.
La pintura por riba de las puortas
Las cruzes que se béian son las de la bia-sacra i nada ténen que ber cun la pintura, mas bei-se bien que son de madeira. La pintura ye subre la parede. Podie splicar cumo se faç, mas nun tengo spácio, mas para quien querga saber mais un cachico, ye ua pintura a que lhe cháman “fresco” , por ser pintada quando la argamassa de la parede inda stá fresca.
Un pormenor de la pintura
L padre Alfredo, cumo esta capielha era mais pequeinha i nun era tan frie cumo la eigreija, rezaba las missas de to ls dies eiqui, ne l Demingo i dies nomeados era na eigreija. Por esso la capielha inda hoije ten todo l que faç falta, até la lampada de l Santíssimo.
Na terça-feira bou a mostrar-bos tamien outras cousas anteressantes que hai na capielha.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
