Cumo bos dixe cuntino hoije a screbir subre la capielha de Santo Cristo, que tamien ye ua obra de arte de ls nuossos artistas que la fazírun i que mesmo apuis, siempre tubírun un carinho special por esta capielha.
Ls pedreiros quejírun mostrar la sue arte na costrucion, de tal modo, que nien las pilas de l’auga benta son eiguales, cada ua ye ua obra de arte.
La de la puorta percipal
La de la puorta de lado dreito
La de la puorta de lado squierdo
L ferreiro fizo ua chabe que mais parece la chabe dun palácio, mas todo l que hai an fierro ye ua cousa que se puode ber, zde las fechaduras a las bobradiças i a todos ls artimanhos de fierro. Mas eiqui nun podie poner todo.
La chabe
Ls carpinteiros i ls talhadores deixórun la sue arte an toda la talha de l’altar-mor i nas puortas, grades de l púlpito i anté na arca de ls paramentos. L’altar-mor yá bos lo mostrei, hoije mostro-bos la arca.
La arca
Tamien mais tarde ls latoneiros fazírun, cun arte, las linternas i anté la bara de apagar las belas fui feita, an 1954, toda trabalhada a la mano, por un artista anónimo.
La linterna
La bara
L pormenor de la data
L que hai para mostrar, solo nua capielha.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
