Ua de las melhores cousas que podemos ouferecer cumo çtino turístico ye la nuossa narureza, l campo, ls páixaros, ls animales, las árboles, las pessonas.
I todo l que se puoda fazer para que todo esso seia coincido nun ye de mais. Muitas bezes somos nós ls que eiqui stamos, que nun mos damos cuonta de las cousas lindas que todos ls dies tenemos a la nuossa ruoda.
Hoije lembrei-me de bos mostrar quatro retratos que móstran trés abes i ua stória.
Ua palomba
Staba la palomba na sue bida de paç, mal pensando que ua águila la tenie yá bisto i se porparaba para la atacar. Ye assi la bida, ls mansos nunca se dan cuonta de las abes de rapina que spreitan para ls comer. You nada podie fazer a nun ser tirar l retrato.
La águila aparciu cumo ua bala
Staba a tirar l retrato a la palomba quando beio la selombra de la águila, cun la máquina na mano fui solo carregar ne l boton. Carreguei dues bezes, mas la águila fui mais rápida.
A la segunda beç yá solo la apanhei cun la palomba.
La águila cun la palomba
Ye assi la bida, tube pena por un lado, mas por l’outro quedei marabilhado an tener presenciado ua cena tan linda de la natureza.
Ye lindo ber an filme ou an retrato, mas tal qual you l bi, nun ten précio.
I este retrato?
La almendreira yá bai reboçuda i inda ten dues almendras que parece que yá nun bálen nada. Son bielhas cumo you, mas ténen un einocente paixarico cumo cumpanha, nun ye lindo?
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
