Ua de las cuontas subre San Balentin diç que, ne l tiempo de l Amperador romano Claudius II, un cura fazie casamentos a las scundidas, por bias que l Amperador ls habie proibido.
Esse cura era San Balentin, que al ser çcubirto fui preso i cundanado a la muorte.
Por todo l ampério passou a ser coincido cumo mais un santo home, que morriu por ajudar ls que se amában. La eigreija recoinciu-lo cumo santo. Cumo morriu ne l die 14 de Febreiro de 269 d.c., este die, ye hoije l die de l’amor, l die de ls namorados.
Na scola primária l tema fui San Balentin i l amor
Fui a la scuola i ls alunos ajuntórun-se todos al lado de ls balones que fazírun , cun l feitiu de coraçones, presos nun solo a dezir : amor, amisade, ternura, carino…
Ne l Ciclo íban dous namorados cumo que a mostrar l que ye todo esso.
Ende ban ls namorados
Sentórun-se nua piedra i quedórun abraçados, era l amor que staba alhi. San Balantin, ne l lugar onde stá, deberie star cuntento.
L amor
Mas you inda quedei mais cuntento, quando ne l Sagrado ancontro un de ls casales de namorados mais bielhos de Sendin. Tamien eilhes, apuis de tantos anhos, cuntínan cumo dous namorados.
Que postal mais lindo para l die d’hoije
Poderie acabar cun este retrato, mas deixo-bos ua pequeinha poesie:
Ye die de San Balantin,
Debemos ser todos armanos.
Porcurar ls namorados
I cumo eilhes dar las manos. ( Ana Isabel da Costa Carneiro – 9 anhos )
( La traduçon ye mie )
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
