Ls ouficios ye ua dança de ls pouliteiros mui anteressante i quando bien dançada inda mais.
Nas sues quatro posiçones mostra ls percipales ouficios que, datrás, éran de ls mais amportantes: ferreiro, carpinteiro, barbeiro i ferrador. Mas habie outros que tamien éran tanto ou mais amportantes cumo: sapateiro, albardeiro, labrador…
Hoije bou a mostrar-bos un desses ouficios, que inda hai por estes lados.
L ferrador i la giente que a las bezes se ajunta a ber
Cumo tenemos la Associaçon de persebraçon de ls burros i yá son muitos, fazie falta un ferrador para tratar de ls cascos de ls burros. Ye siempre mais un amprego i un ouficio que se perserba. Fui a ber l ferrador a trabalhar i cuido que ye anterressante mostrar ls retratos.
A raspar ls cascos
Mas por aqueilho que puode saber, inda hai outro, que até bai por ls pobos a onde inda ye perciso, cumo datrás fazien ls bielhos ferradores de Sendin.
Cumo yá bos mostrei, ne l HOIJE , l die 11 de Dezembre, tenemos an Sendin cabalhos i pista para daprender a andar a cabalho. L ancargado de ls cabalhos tamien faç de ferrador.
L ferrador a arrincar ls crabos
Ls cabalhos i ls burros ténen que ser ferrados para nun se feríren nas patas i las ferraduras son presas als cascos cun crabos, que hai que mudar de beç an quando.
Muita giente trai ls filhos a ber, de quaije toda la Ouropa i muitos de ls nuossos eimigrantes, nin sáben que eisisten estas cousas.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
