De Atanor para Griegos i Granja de Griegos hai percursos terrestres marabilhosos i que son outelizados cada beç mais por turistas que mos besítan.
Hai antretanto quien cuntine a pensar que ser anteletual, saber scebir, ser porsor ou doutor ye l mais amportante para la nuossa bida. Son ls nuobos seguidores de ls “ de erres” de Salazar. Cuidan que l percipal ye séren amportantes i que conhecéren doutores ou giente de l poder ye que ls faç doutores a eilhes.
Un grupo a camino
Ténen l rei na barriga i quien ls oube falar até cuida que ye berdade, que l mundo gira a la buolta de l sou umbelhigo. Fázen cunfrencias i almuorços, reuniones i outras cousas parecidas i assi ban amponendo l feturo, que a las bezes, por artes i manhas acaba de ser cumo eilhes l angenhórun, mas que nada adelantra para la nuossa bida.
Seguindo esse grupo dei de caras cun ls uolhos de l diabro
Quando bi esses uolhos, que ténen ua grande stória, alhembrou-me de screbir esto, porque aqueilhes uolhos alhi stan hai centenas d’anhos i a lembrar las cuontas de siempre. Quando ye que esses doutores bénen porqui a cuntar outras cuontas?
Quando bénen a ber la realidade?
La giente camina i l mundo anda i eilhes antreténen-se a screbir lhonas, son scritores. I quando porqui bénen inda mos cháman eignorantes.
Mais alantre insculturas rupestres
Nós que porqui andamos, mesmo sien mos cunsiderar-mos scritores nin mais sabidos que ls outros, bamos mostrando las cousas i bamos anteressando ls que mos besítan para buolbéren. Mas ls de barriga chena de sabedorie, pássan i nun béian, nien se amportan, nien als filhos móstran l que tenemos. Mas inchen la boca cun l que ye nuosso i fázen caçoada de nós. Até quando?
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
