Quantos de bós fustes a ber a la buossa mai ou a mandar-le ua frol, mesmo de las que hai a la borda de ls caminos?
Ls que yá nun ténen mai cumo you, poderien pul menos lhembrar-la, mas stamos oucupados i straídos de mais para esso. L mundo bai-mos fazendo cada beç menos houmanos sien mos dar-mos cuonta. Inda hai quien se lhembre i ye por haber giente dessa que l mundo inda ye lindo.
Para todas las mais/mães
Hoije houbo un anterro, fui tiu Hourácio, hai mais anterros por anho que nacimentos l que ye triste, mas mais triste ye star ne l semitério, cumo you stube i solo al salir un se lhembrar de la nuossa mai. Que mundo stamos a fazer? Sculpai ls que inda se lhembrórun i que Dius bos l pague.
La capielha de San Miguel de Penilha
De l nuosso semitério bei-se Penilha i onte houbo alhá fiesta, cumo an muitas tierras de ls alredores de Sendin. Mas las mais coincidas son la fiesta de Santa Cruç, an San Martino i la feira de las cantaricas de barro, an Bregancia. De las cantaricas tengo un retrato, yá nun ye deste anho, mas fizo-me lhembrar de quando iba alhá a cumprar ls cacharricos de barro.
Ls cacharros de barro
Nun se puode ir a todo l lado i las fiestas este anho quedórun. Para l anho será se nun houbir mal ou muorte.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
