Todos ls anhos ne l die 3 de Maio ye fiesta para la GNR i zde que me lembro, nesse die pónen la bandeira ne l quartel i bísten las fardas de gala. Quando you era garoto gustaba de ir a ber ls guardas nesse die, porque tenien fardas nuobas i lubas brancas. Tamien gustaba de ber içar la bandeira i naquel tiempo la giente tenie que parar, se passaba por acerca, al içar la bandeira. Mas este anho fui algo special, pul menos an Sendin.
La quantidade de guardas que se ajuntou
Dous ou três reformados de la GNR i de la GF, que móran acá, hai uns anhos que las dues guardas se ajuntórun, pensórun an fazer, an Sendin, un ajuntouro de todos ls reformados coincidos i amigos de la region. Cun las familhas i todo, até bino ua carreira cun ls que stan ne l Porto, éran mesmo muitos. Todo esto mostra que inda hai sendineses cun einiciatiba i que tráien giente a Sendin.
Quando beníen de la missa
Houbo purmeiro missa, na eigreija, por ls que yá morrírun i apuis benírun por la rue de Camino Prado abaixo i por la Abenida de l Ciclo, até l restourante Ancontro, onde fui l almuorço. Ne l camino íban falando, la maior parte, an mirandés i gustórun de ber Sendin, que cumo you oubi a muitos dezir, staba ua tierra amportante.
A camino de l restourante
Mas fui anteressante ber ls trés tocadores que íban a la frente de l grupo. Nun ademira, yá que era un grupo de respeito, séren de ls melhores tocadores que se podíen ajuntar por tierras de Miranda. La Guarda siempre tubo grandes tocadores i dançadores. Ls pouliteiros muito le dében.
Ls tocadores
Para melhor se aperciar ls tocadores quiero dezir, que l gaiteiro era l afamado Cristal de Cunstantin, l caixa l Pera de Atanor, que siempre tubo muita hablidade, até cun ua caixa de cerilhas fazie acumpanhamento i l bombo era Margalho, que fui pouliteiro i toca l bombo, solo cumo quier.
I fui mais ua nuoba de l HOIJE .
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
