Onte fui l die de ls ninos, mas nin siempre esse die ye lembrado por ls pais. La maiorie solo sabe que ye l die de ls ninos, porque oube na telbison ou, se ye die de semana, porque nas scuolas ls porsores fázen algua atibidade. Cumo onte fui Demingo, passou l die quaije sin se saber se era die de ls ninos.
Parede pintada na scuola anfantil
Ls porsores de Sendin siempre se preocupórun cun este die i yá zde 1978 que todos ls anhos se fázen atibidades. Mas son ls porsores ls que mais se preocúpan cun este die. Hai quien querga, para nun tener responsablidades, dezir que ye la oubrigaçon deilhes, mas la oubrigaçon ye de todos por eigual.
Ua sala de la scuola
Ne l die de ls ninos las outoridades i ls pais deberíen tener mais atençon a este die. I las anstituiçones inda mais. Se nun ténen un die ne l anho para ls ninos, qual ye la sue sensiblidade? Ls porsores yá l fázen todos ls dies de l anho. Se nó dezie alhá, se nun stan lindas las salas?
Outra sala
La pintura fui feita por l porsor Manuel Ferreira i las salas son onde trabálhan las nuossas eiducadoras, que inda por riba son mesmo sendinesas. Aninhas Ferreira, Rosa Santiago e Rosalina Afonso (para quien nun sabe stá casada cun Eisidro), que trabalha na sala de Orquidea Cubeiro. You pus hoije ls retratos de las salas, para berdes que para eilhas, l die de ls ninos, nun ye solo un die.
La terceira sala
L HOIJE , an nome de todos ls sendineses, solo bos quier dezir, que anquanto tubirmos eiducadoras cumo bós, Sendin ye melhor i ls nuossos ninos starán a daprender a ser mais felizes, para mais tarde, fazéren tamien felizes ls outros.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
