Neste fin de semana Pica Tomilho stubo an Bale de Cambra a dar un cuncerto i fui un berdadeiro sucesso. Cumo nun podie deixar de ser cantórun an mirandés i fazírun las coreografies que tanto ancántan la giente nuoba. Mas desta beç até ls bielhos deixában todo para ber l spetáclo.
Este fui l momento que fizo correr la giente
Ne l palco dában spetáclo
Quando la banda agrícola sendinesa apersentaba las musicas mais coincidas i cun ua coreografie special, todo mundo bibraba i por bezes parecie que era un cuncerto de ua banda rock de las mais coincidas por toda parte. Solo fui pena la giente nun antender bien l mirandés, mas cumo dezíen alguns, la maiorie de las bandas rock tamien naide las antende.
Era ua banda que nun metie bergonha
De trator por meio de la giente fui ua alegrie
Tamien cantórun musicas nuobas i que la giente gustou. Fui ua atuaçon bin cunseguida i que lebou l mirandés i l nome de Sendin a un lugar bien alto. Muita giente perguntaba cumo cunseguir libros de mirandés i onde poderíen daprender. Ye ua cousa que an outras atuaçones nun se puode squecer. Lebar alguns libros tamien.
Un momento de buona música
Todos stubírun bien
Ye siempre amportante saber que Sendin ye coincido i inda mais, poder assistir a momentos cumo estes. Ne l cuncerto habie tamien muitos sendineses, porque stan spalhados por toda la parte i onde sáben que bai un grupo de Sendin, alhá stan para apoiar.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
