L purmeiro menistro, ang. Socrates, stubo hoije a besitar la barraije de Picuote. Yá bos falei, an Maio, de las obras na barraije i que son de las mais amportantes que se stan a fazer na nuossa tierra de Miranda. Ye berdade que todo l paiç bai a ganhar muito cun las obras i na nuossa region nun quédan ls ganhos, mas hai que lutar por eilhes.
L ang. Socrates na barraije
L purmeiro menistro quijo que fússen assinados alguns cuntratos de obras a fazer na nuossa region. Un de ls mais amportantes fui l de la cunstruçon de la barraije de l Baixo-Sabor. La cunstruçon desta barraije ten sido mui cuntestada por ls ambiantalistas, mas las câmaras de la region son a fabor de la barraije.
L riu Sabor
L ang. Socrates, an que haba quien nun guste del, ye l purmeiro menistro i debemos, na nuossa casa, recebir-lo bien. Quien nun stubir cuntento, quando haber eileiçones, que nun bote nel, agora nun adelantra tratar mal a quien mos besita. Hai cousas que el faç cun que nun cuncordo, mas hoije quedei cuntento cun ua cousa que dixo.
Las arribas na barraije
Ye esta marabilha que el aprediu a ber dun modo çfrente al ler l scritor transmontano Miguel Torga. Dixo l ang. Socrates:
-You nun antendie onde staba l ancanto de las arribas até ler Miguel Torga, mas hoije quedo marabilhado cun eilhas.
Hai que fazer cun que ls nuossos filhos i muitos de ls sendineses que inda nun conhécen bien las arribas, scúbran esse ancanto.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
