Onte falei-bos de la formaçon, an Aranda i hoije bou a falar de la formaçon an Burgos ne l die seguiente.
Habie que aporbeitar l tiempo i fúrun dous dies de muito trabalho. Nin tiempo houbo para ber ls monumientos. Mas nun fúrun squecidas outras formas de promober, al mesmo tiempo, la nuossa gastronomie i ls nuossos binos.
Habie tamien que poupar i se nun die ls bumbeiros d’alhá fazírun l comer, noutro fúrun ls nuossos. Hai que star porparado para todo.
La nuossa Corporatiba tamien quijo partecipar i mandou l bino i assi fizo tamien promoçon.
La maquina de fuogo
Ua de las probas de formaçon fui andar, an cundiçones stremas, ne l meio de fuogo i muito fumo. An Burgos tenien esta máquina, onde se antraba apuis de fazer probas de sfuorço i yá meio cansados tenien que passar por fuogo i fumo, que mal deixaba ber, para podéren saber ouriantar-se i salbar pessonas.
Un bumbeiro a fazer ua proba de sfuorço
A antrar na máquina i Carlos paixareiro a ber
Andrento de la máquina éran seguidos por ua câmara special, que daba para ber todo i assi poder saber se algun passaba mal. Para esses casos, la máquina ten ua salida, por onde ls puoden tirar. Ne l retrato de la máquina podeis ber, ye la parte de rede.
Tenemos que arranjar ua câmara para ls bumbeiros i ócalos para ber ne l meio de muito fumo.
L túnel
Tenien tamien que passar por un túnel de altas temperaturas i onde mal daba para caber, cun ls fatos speciales, mascarilhas i botija de aire. You nunca passei por ua cousa dessas, mas debe de ser bien cumplicado.
Para ls que béien ls bumbeiros cumo meio de ganhar eileiçones i até fálan l que nun dében, serie melhor fazer algua cousa por Sendin, a nun ser andar siempre a la spera de anhos de eleiçones, para sabéren que hai bumbeiros i precuráren gobernar la bida cun algua panela.
Andrento de l túnel
Solo quiero dezir eiqui mais ua cousa, hai muito que fazer an Sendin, speramos por quien querga ajuntar-se a ls que por acá yá l fazemos todos ls dies.
Cumo dezíen ls bielhos:
- Lérias nun adúban sopas -.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
