La nuoba d’hoije ampeça por traer ua çcusson subre l títalo – desabalhados.
Desabalhados éran ls que andában a demudar de sitio de uns anhos para ls outros, cumo ls criados de serbir i ls curas. Habie até ua quadra angraciada subre esso i an que metien tamien ls páixaros de arribaçon, ls cucos:
San Juan de ls cucos,
San Pedro de ls criados;
Santa Sabel de ls curas,
Ándan todos desabalhados!...
San Pedro – eimaige de la nuossa eigreija
Dezie l Pe. Mourinho que ls criados de serbir se ajuntában ne l die de la Trindade i ampeçában a serbir ne l die de San Pedro. A mi inda se me lembra de ne l die de San Pedro, no Sagrado, se apreitáren ls criados. Este anho stube ne l Sagrado a falar esso cun muitos que alhá stában i inda oufereci a un, ua roupa nuoba i uas botas para ser miu criado. Todo era a rir, mas dou para falar nua tradiçon, que muitos bielhos coincien bien.
Santa Sabel (na nuossa eigreija nun hai)
Inda hoije l ancuntrei a trabalhar i mal me biu lougo me dixo que l amo solo l habie dado uas botas. Comigo tenie ganho mais la roupa, fui un risote. L HOIJE, ye el mesmo ua ambora todos ls dies. Quien andaba tamien desabalhado éran ls curas i era uso demudar ne l die de Santa Sabel. Sendin tenie abade i pertenecien a la nuossa abadie ls curas de Ruolos i de Picuote.
San Juan – eimage de la nuossa eigreija
San Juan, quadro an azuleijos na nuossa eigreija
L cuco deixa de cantar i abalha quando anpeça la segada, dízen que ye porque l desonrórun la mai atrás dua morena de pan i quando las ampéçan a fazer por las tierras, na segada, el abalha cheno de bergonha.
Nun fiç la nuoba ne l die de San Pedro, porque cuidei que inda fazien la fiesta ls rapazes de la mocidade, ne l Sagrado, mas cumo cada beç son menos, yá nun la fázen, l que ye pena. Mas la bida stá defícel i nun hai cun que pagar la musica.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
