La Associaçon de porsores de l Praino reuniu an Sendin, na Copratiba para tornar a poner l grupo de danças de nuobo an atibidade, yá que zde algun tiempo a esta parte, por cousa de la salida de alguns porsores i la falta de nuobos, stubo algo parado. Mas alhá se cunseguiu que todo ampeçasse de nuobo.
Ls pouliteiros antigos
Quaije todos ls bielhos aparcírun i tratórun lougo de ber se inda sabien la dança de ls palos. Fui solo ampeçar i apuis de trés ou quatro buoltas, yá parecie l grupo de siempre, mas las piernas ye que yá nun ajudában. Apuis metírun-se alguns nuobos i yá quedórun marcados ls ansaios.
Ls pouliteiros a ansaiar
Las porsoras tamien ansaiórun las danças mistas i parece que stan mais lebes que ls homes. Tamien nestas danças hai que arranjar giente nuoba, mas ye mais defícele, porque hai menos porsoras nuobas cun buntade de daprender. Porsores hai de todo, até un que yá toca bien la gaita de foles.
Las porsoras na Copratiba
L persidente de la Associaçon ye l porsor Campos, de Sendin. Cumo an todo, Sendin stá na delantreira i an todas las atibidades colabora i ten giente capaç.
Ne l fin houbo ua cena cun caldo berde, sardinas cun pomientos assados, barriga de cochino assada na brasa, salada i bino de l melhor de la Dega, mas pago por ls porsores Zé Ster i Zé Almendra.
L ansaio final
De la cena nun pongo retratos para nun bos fazer crecer auga na boca.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
