Todos ls anhos la Associaçon de Atanor faç un torneio de FUTSAL ne l campo que ten ajunto de la sue associaçon. Partecípan eiquipas de bárias aldés i de bários ampresários de ls alredores. Este anho son 10 eiquipas i ye un torneio, an que l cumbibio ye l mais amportante i ye tamien un modo de fazer ls nuossos moços se ajuntáren i se conhecéren melhor i gustáren de benir a passar las bacanças cun nós.
Un grupo de moços a ber
Nun bou eiqui a falar de ls resultados, yá que l mais amportante ye l çporto. Estes torneios tamien son amportantes, para ber ls jogadores que ténen mais hablidade i assi ber ls que puoden benir a jogar ne l G.D.Sendin, ne l G.D.Mirandés i ne l F.C.Mogadourense. Solo ye pena que alguns nun puodan quedar, porque ban a studar para loinje i outros son filhos de eimigrantes, mas la bida ye assi.
Las eiquipas de Sendin i Miranda a jogáren
Hai filhos de eimigrantes que bénen de bacanças para las aldés alredor de Sendin, solo para jogáren i cumbibir nestes torneios. Hai-los an Palaçuolo, Prado Gaton, Bemposta, Sendin i muitas mais aldés. Mesmo las moças gústan de acumpanhar i muitos tráen las namoradas. Esta tamien ye ua forma de promober las nuossas aldés i traer turistas.
La mesa de ls árbitos
Tamien stában a ber, moços i moças que bénen passar uns dies a la associaçon de ls burros. Bénen muitos a ajudar ne ls trabalhos de la associaçon i para bibir nestas tierras de ambiente saludable, l sou tiempo de bacanças.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
