Un parque de campismo ye ua cousa que faç falta, inda que pequeinho, puis cada beç ye mais deficele acampar sin ser an locales própios. Stá proibido an muitos sítios i anton fazer de comer muito mais defícele ye, mesmo ne ls parques de merenda que andórun a fazer, nun se puode fazer lume.
Ua bista de l parque de campismo de Sendin
Nun se puode dezir que seia un berdadeiro parque de campismo, mas ye assi que le cháman, mas solo sirbe ne l Berano i para apoio al festibal Antercéltico. La Junta de Freguesie stá a limpar todo i bai a tener las cundiçones mínimas. Ten retretes i chubeiros i onde labar la louça. Ten auga i luç i ten muro a toda la buolta.
L eidefício de lado de ls chubeiros
L terreno ye alugado, mas serie amportante pensar an cumprar todo i fazer un parque bien arranjado i cun todas las cundiçones. Para algua cousa son ls porjetos, a nun ser que seian solo para alguns. La Junta de Freguesie ou la Câmara ténen la responsabilidade de ancuntrar ua soluçon, a nun ser que haba quien querga ambestir nesso. La AZATS tamien puode ajudar a ancuntrar ua soluçon.
L eidefício de l outro lado
Eiqui stá ua cousa que debiemos çcutir i que l HOIJE aperpon para ls debates que se stan a fazer.
L sitio ye ancantador i queda acerca de la piscina i puode ser un buono parque ambiantal. Yá ten selombras i l terreno pouco percisa de ser trabalhado. Um buono arquiteto puode fazer ua cousa linda.
Ua mesa para comer
Ne ls anhos passados fui mui outelizado ne l més de Agosto i mesmo ls alunos de l Ciclo passórun alhi un die i ua nuite para sabéren l que era acampar. Mas este anho tubírun que ir para l de Miranda, porque las eisigencias son outras.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
