La cruç de l semitério staba scachada, cumo yá l HOIJE habie anformado, mas chegou la hora de la ber cumpuosta. Para que todo quedasse cumo antes fui perciso ls de l património dáren ordes de cumo se habie de cumponer i l seguro cuntratou ua ampresa specializada para colar todas las pieças, de modo a quedar cumo staba dantes.
A ponéren la queluna de la cruç de pie
La parte de riba de la cruç
La ampresa solo fui cuntratada para cumponer la gruç i nó todo l cruzeiro. Fui pena nun tenéren cumpuosto todo. La cruç quedou bien, mas las scaleiras de l cruzeiro, quedórun tal qual stában i tenie sido ua buona oucasion para las andreitar.
Yá parece la cruç de toda la bida
Outra obra que tamien yá bai acabada ye l semitério i yá ten l nuobo puorton de l lado de l camino de Miranda. An drento, de l lado de l campo de la bola, fazírun yá las foias an blocos, para nun tenéren de anchir la parte mais baixa de tierra. La outra parte quedou an tierra.
La parte nuoba de l semitério
L puorton
L parque de las eiras yá bai tamien adelantrado i spera-se que yá sirba para l Antercéltico. Nun hai dúbedas que Sendin stá muito defrente para melhor.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
