Onte a la nuite fui la 3ª. Palhestra ourganizada por la AZATS i la Casa de la Cultura de Sendin i fui un momiento alto de cultura. Nun solo para Sendin, cumo para toda la tierra de Miranda. L tema era la léngua mirandesa i l ourador, l scritor de léngua mirandesa, Amadeu Ferreira.
La mesa que ourientou la palhestra
La giente
Amadeu Ferreira, l maior studioso de la léngua mirandesa fizo ua palhestra que deixou muitos ansinamientos i porpuostas para l feturo de la léngua. Las anterbençones de ls partecipantes fúrun tamien mui baliosas, até porque habie giente que falaba bien l mirandés i fui anteressante poder oubir falar l sendinés i l mirandés de fuora de Sendin, por pessonas que l fálan tan bien.
Amadeu Ferreira a falar
Habie pessonas de l pobo i studiosos i scritores de mirandés. Stában quatro porsores de l Anstituto Piaget, que stan a fazer un trabalho subre l mirandés i fui anteressante tamien oubir-los. Mas registremos ls pontos mais amportantes:
- La léngua stá a caminar cada beç cun mais apoios i cun mais giente anteressada.
- La léngua ye ua fuonte de zambuolbimiento i de rendimiento para la region.
- L mirandés ye ua de las melhores marcas que tenemos i de las mais amportantes para l turismo.
Ua parte de las pessonas
L que ye neçairo fazer para alhá de l studo, de l ansino i de la scrita de obras de literatura mirandesa:
- Un museu de la léngua.
- La criaçon de l Anstituto de la Léngua Mirandesa.
Outra parte de las pessonas
Subre todo esto l debate fui mui animado i houbo ua pergunta que quedou para todos:
- Mas cumo fazer i que fazer?
Amadeu Ferreira dou eideias i falou tamien ne l que yá stá a fazer-se nesses campos todos. La AZATS i L SONS da TERRA ampeçórun yá a trabalhar nua forma de cunseguir l museu i para esso puoden cuntar yá cun l apoio de l porsor Amadeu.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
