Faç hoije 18 anhos que Sendin passou de aldé a bila. Inda hai ls que nunca perdonórun que se tubíssen lembrado de pedir a la Assemblé de la República para Sendin ser bila. I cuntínan a dezir que era melhor ser ua buona aldé que ua rui bila. Mas Sendin yá ye ua linda bila, solo nun bei quien nun quier. Agora nun podemos querer l cielo na tierra.
La cerimónia de l ampeço de la fiesta
Stubírun persentes l Gobernador Cebil, l Persidente de la Câmara, l Persidente de l Turismo, la persidente de la Direçon Regional de Salude, la Diretora de l Centro de Salude i ls persidentes de todas las Associaçones locales. L persidente de la Junta falou de todas las obras que se stan a fazer i de l apoio de la Câmara i de l Goberno que ténen sido amportantes.
Las pessonas i outoridades persentes na cerimónia
Tamien falou ne l que ye perciso i tanto l persidente de la Câmara, cumo l Gobernador Cebil cumo repersentante de l Goberno, mostrórun l anteresse an cuntinar a apoiar Sendin. Nós queremos siempre mais i todo mos parece pouco, mas hai muita cousa que se stá a fazer i outras que se stan a porjetar.
Na sposiçon
Apuis de la cerimónia fui abierta ua sposiçon de ua auto-didata, na Casa de la Cultura i de seguida fui la missa por todos ls sendineses que yá nun stan bibos.
Acabada la missa fui benzido l semitério i seguiu-se un simulacro de fuogo cun salbaçon de dues pessonas de drento de ua casa, ne l Sagrado. Fui un spetáclo ber ls bumbeiros a trabalhar i toda la giente quedou cuntenta i era muita la que staba a ber.
Ls bumbeiros an açon
A tirar ua pessona por slide
L simulacro que fazírun ls bumbeiros, fui para mostrar l que durante un anho se faç, i que Sendin ten uns bumbeiros cumo las sedes de cunceilho i que móstran neste die, porque somos tamien bila. A todas estas cousas assistírun muitas pessonas mesmo de las aldés bezinas i puode mesmo dezir-se que éran mais de mil.
Mais un retrato de l simulacro
La giente que habie a ber l simulacro
Acabado l simulacro fui l cumbibio de toda la giente i nun faltou de comer i de bober. Fui cun grande alegrie que l HOIJE pudo ber ls repersentantes de l Goberno i de la Câmara a cumbibir cun la giente. Sendin ye mesmo ua tierra special, anque haba meia dúzia que quieren fazer crer l cuntrairo. Solo Sendin cunsegui que las outoridades persentes se quedássen l die anteiro a cumbibir ne l meio de nós.
Las outoridades a comer ne l Sagrado
La giente era mesmo muita
Por fin, fúrun dados ls galardones d’honra a ls sendineses que yá morrírun i que bien ls merecírun.
- Drº. Raposo, que curou a tanta giente i ajudou a nacer tanto sendinés.
- Drº. Balentin Guerra, que fizo l Eisilo i dou l campo de la bola.
- Eirmelinda Fonso, que quando habie tanta falta de áuga, mandou fazer l furo de la Rue de la Frauga i cumpuoso l relógio de la eigreija.
- Eiduardo Leixo, que dou trabalho a tanta giente, quando la bida era defícele i ansinou a tantos la arte de sapateiro.
Ls que trbalhában na sapatarie de tiu Eiduardo
Para acabar la fiesta cantou l Coro de Sendin, que mais ua beç mostrou que Sendin ye mesmo ua tierra d’ancanto cumo eilhes cantórun. Quien faç ua fiesta cumo esta i ten giente tan aguerrida, ten mesmo que ser bila i ua bila que se puode ourgulhar, cumo dezie l Gobernador Cebil, que tamien ye sendinés.
Ua parte de l Coro
Outra parte
Tube que tirar assi, ls retratos de l Coro, porque la mie máquina nun daba mais, mas tirei mais de 70 retratos que manhana podereis ber ne l sitio de ls retratos.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
