Un grupo de sturianos de la Associaçon cultural i l persidente i bareadores de l Cunceilho de Bimenes, acumpanhados por l bereador Carção de la Câmara de Miranda do Douro, fazírun ua besita a bários locales de l cunceilho de Miranda i fui cun amisade que ls recebimos na Copratiba de Sendin.
Ls membros de la Câmara, l bereador Carção i l persidente de la Copratiba
Besitórun todas las anstalaçones de la Copratiba i fui-le splicado cumo funcionaba todo, zde la antrada de las ubas até a la salida de las garrafas chenas. Quedórun ademirados por ber la Dega i nunca pensórun que Sendin tubisse ua Dega assi. L persidente de la Dega dou-le a porbar l bino i mais ua beç quedórun ademirados de tenermos bino tan buono.
A oubíren la splicaçon
Cumprórun alguas garrafas i seguírun para besitar outros sítios. Ye pena haber muitos sendineses i mesmo muitos sócios que nun conhécen la sue Dega. L persidente, an todas las reuniones dá l bino a porbar als sócios i cumbida-los a besitar la Dega, mas inda hai muitos que nun se ampórtan cun nada, apuis fálan sin saber.
L grupo que besitou la Copratiba
Cumo stában tamien persentes pessonas ligadas a la léngua sturiana i ye amportante dezir que Bimenes fui de ls purmeiros cunceilhos a ancentibar l sturiano, l persidente de la Copratiba, tamien persidente de la AZATS i l bereador de la Cultura de la Câmara de Miranda do Douro, trocórun anformaçones i quedou de se fazer un trabalho cunjunto. La Câmara de Bimenes mostrou-se anteressada an poner l nome de Sendin a ua rue de Bimenes.
L palácio de martimporra (Bimenes)
Hai que fazer cousas i nós porqui bamos fazendo. Estas cousas nun se puoden eignorar i ye por esso que l HOIJE las dá a coincer, se nó inda hai ls que cumo San Tomé, porque nunca béien nada ou nun quieren ber, inda ban a dezir que Sendin stá na eidade média i que nós inda nin sabemos ler. Sendin ten muita giente que andou nas ounibersidades, nun fúrun alhá passar un més de férias i salírun doutores, studórun i son doutores porque l merécen.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
