La Rede Social ye un cunjunto de antidades publicas i pribadas que se ajúntan para eissencialmente cumbatir la probeza i la scluson social i al mesmo tiempo porcurar pormober la ancluson i la ajuda social. Hai siempre giente que percisa de ajuda i para melhor se chegar a las pessonas, l Goberno criou la Rede Social que ten por base l CLAS ( Cunceilho Local de Açon Social ).
L persidente de la Junta a apersentar las téquenicas de l CLAS
Outra de las struturas de la Rede Social, ye la CSF ( Comisson Social de Freguesie ) i fui para criarmos an Sendin la CSF, que se fizo esta reunion. L persidente de la Junta i las téquenicas Harminia i Crestina de l CLAS persidírun a la reunion, onde stubírun eilementos de bárias anstituiçones de Sendin.
Alguns representantes de las antidades
Apuis de feitos ls sclarecimentos i de se analisáren ls decumientos fúrun feitas bárias anterbençones por bárias pessonas i quedou acordado fazer-se an Sendin la CSF. Esta comisson bai a reunir ne l més de Setembre, para l que se ban a cumbidar todas las antidades que hoije nun podírun star persentes.
La partecipaçon fui buona
Ye cun estas einiciatibas que Sendin, ou melhor, ls sendineses que stan siempre prontos a trabalhar i a fazer cousas móstran l sou balor.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
