La seleçon femenina de cadetes, de boleibol, bino stagiar ne ls alredores de Sendin. Stan na Casa de la Mocidade de l Barrocal de l Douro i tréinan ne l pabilhon de l Ciclo de Sendin. Stan a fazer l stágio para l campeonato de la Ouropa. La Câmara dou todo l apoioi, cumo dixe l selecionador i nada ten faltado. L pabilhón de Sendin tamien ye eicelente i tamien nada l ten faltado por parte de ls ampregados, mesmo para alhá de la hora de serbício.
La seleçon
Para quien pensa que nun se faç nada por la region i pul turismo, de cierto que pensa que esto nun ye nada, mas todo ye amportante. L HOIJE fui al treino d’ hoije a la tarde i biu que las jogadoras éran de bárias partes de Pertual i acumpanhou ls pais de alguas, que aporbeitórun para benir a ber Sendin. Gostórun muito i ansinei-le muitas cousas para besitar.
L treino
Ten jogadoras cun muito feturo
L treinador apersentou-mos todas las jogadoras i ua a ua fúrun dezindo donde era i l que fazie. Quedemos ademirados cun l balor destas moças, que dan muito de l sou tiempo libre al çporto i sin ganhar nada, mas l mais amportante ye que todas son alunas de 18 balores de média. Inda hai buonos eisemplos ne ls moços i moças d'hoije.
L treinador adejunto a dar ourientaçones
Ua buona jogada de boleibol
Nós tenemos un clima mui buono i un ambiente saludáble i sitos cun cundiçones para recebir muitas outras eiquipas. Muitas son las açones porgramadas i que ban animando la nuossa tierra. Era amportante que ls filhos de ls nuossos eimigrante, drento i fuora de l paiç, fússen ancentibados a falar l pertués i l mirandés i que beníssen mais bezes. La responsabilidade tamien ye de ls pais. Quien, nin ls filhos cunsigue motibar, que quier fazer por ls outros?
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
