Onte fui l último debate de un ciclo de palhestras que l Centro de Música Tradicional i La AZATS fazírun. Fui ua atibidade caras al zambuolbimiento i que dou buonos resultados para alhá de la çcuçon de eideias i la percura de soluçones para ls porblemas. Ua cousa fui amportante, las pessonas partecipórun i tomórun cuncência de que Sendin stá yá melhor que al percípio se pensaba.
La mesa de ls trabalhos
La última palhestra fui subre l ansino i l ourador fui l persidente de l Cunceilho Diretibo de l Ciclo, que mos fizo ua palhestra mui amportante subre ls porblemas que l Agrupamiento de Scuolas ten i tamien de l que se stá a fazer i que yá ye muito, cumo l HOIJE bos ten mostrado nestes últimos meses.
L ourador a mostrar l gráfico de alunos
Falou de l porblema de la falta de alunos i las percipales rezones para que tal tenga acuntecido. Para alhá de la deminuiçon de la populaçon, houbo outras causas motibadas por alteraçones ne l ansino. Todos tenemos cuncência que Sendin nun ye sede de cunceilho i las populaçones de l cunceilho de Mogadouro son ancentibadas a ir para alhá.
L gráfico de alunos
Cumo se puode ber, a partir de que se dou liberdade de ls alunos de l 2/3 podéren scolher, houbo ua reduçon de ls alunos (ber a partir de 1994), mas a partir de 2000 ampeçou-se a recuperar, mas cun l tresporte gratuito para las sedes de cunceilho (2005) tornou a haber outra reduçon de alunos yá que muitos passórun a acumpanhar ls armanos mais bielhos.
Ua parte de las pessonas persentes
Fúrun dadas outras anformaçones subre l funcionamento de l Agrupamiento de Scuolas de Sendin, la partecipaçon de ls pais, las atibidades i ls resultados. A partir deiqui, l debate fui animado i fui amportante la anterbençon de l porsor Campos i de las Doutoras Ourquídia i Ção, que mos dórun muitos eilementos i eideias para l feturo.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
