L artesanato ye ua de las atibidades que se puoden splorar para cumplementar las oufertas turísticas. Nun puode ser la atibidade percipal, mas puode i debe de ser, ua atibidade que muito puode cuntribuir para l turismo. Tenemos que de ua beç por todas antender que artesanato hai an todo l mundo i de las formas mais bariadas, por esso nun podemos pensar que l nuosso ye l melhor i bai a ser la sabaçon de l turismo.
Ua casa modelo de artesanato
La casa que bos mostro ye ne l Sagrado i puode dezir-se que ye ua de las melhores i cun mais gusto de l Nordeste. Se reparardes, stá bien recostruida i ye ua de las cousas buonas que Sendin ten.
I Sendin nun ten nada!...
Mas an drento ten ua berdadeira oufecina de artesanato. L HOIJE fui alhá i stá a mostrar-bos ls retratos de l que alhi hai. Era amportante que las pessonas la besitássen, mesmo solo para ber i podéren dezir a quien mos besita, que tenemos ua casa de artesanato cumo poucas tierras ténen.
Sandra a trabalhar
Sandra recebiu-mos mui bien i mostrou todo l que faç. Fui pena nun tenermos ua máquina melhor de tirar retratos, para poder ber todo melhor. Aporbeitando la tequenica de toda la bida, para alhá de fazer l artesanato tradicional, faç tamien roupa cun panhos tradicionles, mas cun modelos modernos.
L artesanato tradicional
La roupa de stilo
Mas la casa ye un berdadeiro museu bibo, onde se bei trabalhar i se puoden daprender las tequenicas de todo l rendilhado de ua capa d’honras ou dun jaleco, dua camisa de Lino ou dua saia de lana bordada. Mas la roupa de stilo nada queda a deber a las melhores stilistas.
Un fato de mulhier, que marabilha!...
Solo por ir a ber esta casa, yá bale la pena benir a Sendin.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
