Mais un sitio que Sendin ten i que solo ye possible porque ls sendineses ténen lutado por esso. Ye mais ua proba que tenemos cundiçones para ser bila i ua bila moderna. Cada beç ye mais amportante besitar las cousas que tenemos, para nun andar siempre a tratar-mos cumo pessonas que nada fazemos.
L eidificio de la piscina, nua abenida que era un lodaçal
Muitos moços i moças ban a la piscina i pássan las bacanças de ua maneira agradáble. Tamien ls maiores ban, mas inda hai falta de hábito i muitas bezes porque nun se ancentíban mais las pessonas. Ls motards ban a fazer para la sumana l sou festibal i bai a ser na abenida de la piscina i nesses dous dies la piscina stará por sue cuonta.
La piscina a la tarde
Hai siempre muitos moços i moças alhá
Porque hai que tener ciertas cundiçones para quien bai alhá, la piscina ten un bar onde hai bebidas frescas i gelados. Tamien nun falta de comer. Queda acerca de l parque de Campismo i ye un sitio onde se puode passar ua tarde agradáble.
L bar
Era amportante que ls nuossos eimigrantes ansinássen estes sítios als filhos ou pul menos dezir-le que ls hai, para ls ancentibar a benir mais bezes a passar las bacanças a Sendin, para cumbibíren cun ls moços i moças de l sou tiempo, cun família que a las bezes nin conhécen i mostrar-le que saber pertués ye hoije mui amportante, tanto cumo saber francés i que saber mirandés ye ua de las maiores riquezas culturales.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
