Ne ls últimos anhos muitas son las casas que fúrun recuperadas i que manténen la arquitetura tradicional por fuora, mas que an drento se mantubo l que era possible i se melhorórun cun las anstalaçones de auga i luç i la cunstruçion de casas de banho.
La sala de comer
Ua cama
Las salas de comer i las cozinas manténen l tradicional i son decoradas cun cousas antigas ou pieças de artesanato i nalguns casos cun obras de artistas de la region. Hai pinturas, sculturas i até obras feitas por ls duonhos, que fázen deilhas berdadeiros museus, mas an que las obras sírben para outilizar ou para decorar las casas.
La cozina
L louceiro
Nun pequeinho studo que l HOIJE fizo, ancuntrou ua dúzia que puoden ser antegradas nua rede de ouferta de casas para turismo. Para alugar haberie que las anscrebir, mas la maiorie de ls duonhos dízen que las fazírun sin sbsidios i que yá sírben l turismo, puis ye por tenéren essas casas assi, que eilhes i ls filhos bénen mais bezes a Sendin.
Un canto de la casa decorado
Un jugo de las bacas a decorar ua parede
L sou eisemplo bai cuntaminando a outros i outras tantas stan an recuperaçon, dízen que muitos amigos i coincidos bénen cumo cumbidados i que esses son tamien turistas.
Por béren l SAL, muitos eimigrantes que habie mais de 30 i 40 anhos que nun pensában an benir, bénen por curjidade i para béren la sue tierra, onde yá nun béien la miséria que habie quando salírun.
Hai que pensar que ls que acá quedórun tamien son giente de balor, porque guardou la tierra, la léngua i la cultura.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
