Ua bista de las arribas
Ne l Praino tenemos tamien ua associaçon de ls duonhos de ls palumbares i que ten por oujetibo la perserbaçon i cunserbaçon de ls palumbares de ls çtritos de Bragança i de la Guarda i tamien cuncencializar las pessonas para la amportancia de ls palumbares tradicionales.
Un palumbar na Capielha
Ye grande la amportancia de ls palumbares para l ambiente i la pesserbaçon de las abes de todo l Douro Anternacional. Esta associaçon ten cumo sócios i percipales dinamizadores, muitos moços i moças, que dan muito de l sou tiempo a recuperar i a tratar de ls palumbares i de las palombas.
Este ye na Perdigueira
Esta associaçon ten ligaçon cun la AEPGA de que yá bos falei muitas bezes. Faç muitas atibidades nas nuossas aldés i campos de bacanças cun moços i moças de bários paízes, outilizando la Casa de la Mocidade de l Barrocal de l Douro.
Outro palumbar recuperado
Cumo se puode ber la giente de Sendin colabora i ajuda. Mais ua beç i para que se saba, muito se faç i ls partidos ye que ténen que mos dezir l que fázen eilhes cul nuosso denheiro, que tráten de mos splicar i nun béngan a mandar perguntar l que fazemos nós. Tanto l PS cumo l PSD, zde que ándan a pensar nas eileiçones, arranjórun uns i uas pamtomineiras para mos zbiar de l que ye amportante.
Este ye an Riei las Fuontes
Ls palumbares cumo podeis ber puls retratos, son ua cousa amportante para la beleza de la peisage de las arribas. I ye lindo ber yá, bandos de palombas a bolar por bários sítios.
I nós ye que somos pantomineiros…I tenemos que dar cuntas…
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandes.
