La chegada al parque de campismo
Un grupo de ninas i ninos acumpanhados de ls monitores de ls tiempos libres i que stan a passar ls tiempos libres na Casa de la Criança Mirandesa, fúrun hoije a fazer un acampamiento ne l campo de campismo de Sendin i ban a passar alhá la nuite, an tiendas.
Las mochilas i ls que stan a tomar cunta
Las tiendas
Anquanto uns porparában todo, outros íban jogando l fito, l anielho i outros jogos tradicionales. La Casa de la Criança para alhá de l lar de ls eidosos, ten ua creche a funcionar i agora ten, ne l Berano, un porjeto de oucupaçon de ls tiempos libres para ls ninos i ninas.
A jogar l fito
A jogar l anielho
La Casa de la Criança ye tamien ua Casa que recibe moças cun porblemas eiducatibos i moças que yá nun ténen pais. Son muitas las atibidades, mas tamien las responsabilidades i inda bien que bai habendo moços i moças que gústan de ajudar ls outros. L acampamiento ye ua atibidade amportante para que muitos ninos dapréndan a bibir fura de casa.
A daprender a passar las paralelas
Ne l acampamiento tamien daprénden atibidades que puoden ser amportantes saber, cumo esta de las paralelas. Chama-se assi porque son dues lúrias, ua por riba de la outra i que sírben para daprender a passar un ribeiro de un lado para l outro, ou outra situaçon parcida, onde nun haba outro remédio.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
