La Casa de la Cultura bai a star outelizada todos ls dies, ne l Berano, ye l que la AZATS i la Junta bán a porcurar fazer, se nun aparcir quien benga a criar porblermas. Para fazer las cousas hai que tener quien trabalhe i nó quien benga a cumplicar las cousas. La sposiçon que fui einaugurada bai a quedar por alguns dies i outras se stan a porparar, assi cumo outras atibidades.
Un canto cun ua arca de madeira antiga
L labatório
La artista chama-se Mariana Moreno i faç trabalhos de recuperaçon de cousas antigas i decoraçon de outras cun bários materiales. Nesta sposiçon son anteressantes la decoracon de un labatório i de panelas i garrafones de bidro. Tamien faç trabalhos an gesso amassado cun panho de algodón.
Ua arca decorada
Ua bista de la sposiçon
La artista tamien pinta i ten quadros anteressantes. Ye ua de las atibidades que se dében fazer na Casa de la Cultura. Dar a coincer ls artistas de la region i tener un spácio para ls turistas que quérgan besitar. Fui ua buona einiciatiba de la Junta de freguesie, mas tenemos an Sendin, dous de ls melhores artistas an trabalhos de madeira i de fierro, sendo este un de ls melhores de Pertual.
Las pinturas
Un quadro anteressante
Solo querie fazer deiqui un alerta subre ls dous sendineses que, an trabalhos de madeira i de fierro, son de ls melhores que hai i ténen sido solecitados para ir a bárias partes de l mundo, mas nun ténen tenido l apoio neçairo. L HOIJE bai a mostrar-bos ls trabalhos desses artistas.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
