Yá muito se falou subre l que hai para ouferecer, an Sendin, als turistas. Hai muita cousa l que faç falta ye saber mostrar l que tenemos i saber bender l que se puode. Yá bamos fartos de oubir giente que nun conhece nada nin ten anteresse, mas solo porque fui para outras tierras cuida que ten las receitas todas.
Ls artimanhos de tiu Cisnando
Nós nun podemos querer un turismo cumo l de ls outros lados, porque desso stá l mundo cheno. Tamien nun podemos pensar solo an artesanato. Hai que saber apersentar cousas çfrentes i para esso tenemos muito. Tenemos que saber antre todo, mostrar l que de buono hai i ye muito. Hai muito sendinés que nun sabe l que hai an Sendin.
Ls licores i las cumpotas
L sitio para probar todo
Tamien nun podemos pensar ne l turismo para nós, mas para ls que bénen. Para traer giente hai que trabalhar de ua maneira i para l ouferecer l que tenemos, de outra. Mas las dues ténen que se cumpletar. Porqui yá bamos bendo einiciatibas anteressantes i nestes dies, an que stubírun muitos turistas l Hoije puode acumpanhar l que se passa.
Un quadro de Maria Fernanda
Outro de ua coleçon que stá a fazer
Aporbeitando la oufecina de l pai, onde ten ls artimanhos todos para ls turistas ber, ten ls licores i las cumpotas que faç, de modo artesanal i cun ls pordutos de la nuossa region. Yá ten un libro subre esso todo. Mas para fazer rendir mais l sou staminé, ampeçou a pintar i bende ls sous quadros. Stá a fazer ua coleçon de pinturas subre las arribas. Esto ye fazer algo i mostrar-lo tamien.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
