Quien quier ser de ls melhores ten que fazer por esso. Ye l que fázen ls bumbeiros de Sendin, precurando adonde hai formaçon specializada, para stáren porparados, cumo porfissionales. Eilhes quieren siempre mais i melhor, para podéren ir a qualquiera parte onde seia perciso.
Cun ls bumbeiros spanholes
Ua de las necidades, por bias de las arribas i de las barraiges, ye star porparado para scalar até grandes alturas. Para esso fúrun treinar a Aranda de l Douro, que ten ua rue cun l nome de Sendin i que ten dous bareadores hounoríficos, tamien de Sendin, Anibal Moreno i Jesé Almendra.
Fúrun a daprender cun ls bumbeiros porfissionales d’alhá, yá que alhi ténen sitio para dar essa formaçon. Esso solo fui possible dadas las buonas relaçones que hai cun Aranda i l coincimiento que l nuosso comandante ten, cun ls bumbeiros spanholes.
La torre de scalar
Jesé paixareiro a treinar
Ye un eisercicio bien deficel, mas que ye amportante para la formaçon i treino para se poder scalar de muitas maneiras. Ls bumbeiros de Aranda son porfissionales i ténen ua scaleira para grandes alturas. Tamien daprendírun a outilizar essa scaleira i assi podéren ir ajudar outros bumbeiros i noutras situaciones.
La scaleira
Nelson na scaleira
Apuis de l treino an Aranda, cun alguns bumbeiros de Aranda fúrun a Burgos onde ban a daprender a andar an situaçones de fumo i fuogo drento de simuladores de situaçones de grande risco. L HOIJE bai star tamien alhá.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
