De todas las feiras de l Praino, poucas ban quedando i quando se fala an feira, todos anténden que se stá a falar de la feira de Mogadouro. Las demais fúrun quedando cada beç cun menos amportáncia, yá que éran tamien feiras de ganado i este deixou de se poder bender nas feiras.
La feira de Mogadouro
La feira de l Naso inda se bai fazendo, ua beç por més, porque ye ua tradiçon que nun ye fácele acabar, mas tamien porque ye l melhor sitio de ancontro de ls mirandeses. La de Palaçuolo, cada beç cun menos giente, mas bai-se aguantando, porque ye la melhor de la parte Sul de l cunceilho.
Stamos ne l tiempo de poner las patatas
La feira de l dous de Março ye la purmeira feira de l anho a tener las nuobas de la agricultura. Son las patatas para poner, ne ls sítios mais calientes i son las árboles de fruito, las almendreiras, las oulibeiras i ls bacielhos ou las cepas de ubas de comer, que aparécen para ls apressados.
Ls bibeiristas
Mas tamien ban yá aparecendo ls alforraques i nun fáltan las alfaces, ls pomientos i las cebolhas para poner al cedo. Nesta feira, yá habie tomateiras, mas todo este alforraque inda solo sierbe para matar l deseio ou para poner an sítios mui speciales, para algun antolho de Maio.
L’alforraque
Na próssima feira de l die 16 yá ampeça a ser la feira de todo l que faç falta para poner las huortas. Mas la feira de Mogadouro ye siempre ua feira onde hai de todo.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
