Ua de las aldés mais cercanas de Sendin ye Prado Gaton, ua de las tierras mais anti(g)as de la tierra de Miranda i cujo nome yá aperece ne ls purmeiros foros de l mosteiro de Moreruela. Hoije ye ua aldé bien amanhada i que pertenece a la freguesie de Palaçuolo i l sou termo faç lemite cul de Sendin.
La capielha de Santo Cristo
La giente bai arralando cada beç mais, cumo por todas las aldés de la tierra de Miranda, mas tal nun ten eibitado que ls que por acá ban quedando, nun la persérben i la ban tornando mais guapa a cada die que passa. L arranjo de la capielha de Santo Cristo i l spácio alredor deilha quedou bien guapo i ye un sitio agradáble.
L campo de jogos
Outra obra amportante ye l campo de jogos para la mocidade i que ne l tiempo de bacaciones stá siempre an atibidade. Stan agora a cumponer todo l campo alredor del, para que puossa serbir para ajuntar ls moços i moças de las bárias tierras alredor, para cumbibios i ancontros çportibos ou de studo.
L poço bai a quedar bien amanhado
I la bica, cun ua pila anti(g)a, tamien
Passaba hoije por lhi i bi ls trabalhos de que bos dou la ambora. La crise tamien se cumbate cun pequeinhas obras publicas, que las Juntas i Câmaras púoden fazer i para las quales era amportante mais apoio de l Stado.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
