L HOIJE passou a ser ua refréncia para muita giente de las aldés alredor de Sendin i quando besitamos algua, lougo pergúntan quando sale na anternete, la ambora, mesmo giente de las outras aldés yá mos dízen que l HOIJE ten que poner nuobas dessas aldés i dízen mesmo que ye alhi que se fala mais l mirandés.
L parque anfantil de Fuonte Aldé
Fuonte Aldé ten uas Eiras mui grandes i cun auga todo l anho, ne ls últimos anhos ténen feito l arranjo de ua parte i para alhá de l parque anfantil, ten tamien un sitio cun mesas i onde fazer ou calenatar l quemer. Ye pena nun habéren ponido lougo plantas para dar selombra.
L sitio de las mesas i de ls assadores
Ten tamien un poço cun ua bomba manual
Lougo alhi acerca ten un lago onde ándan siempre patos salbaiges i l campo de la bola, que cumo ye pouco outelizado i las Eiras son un prado, parece mesmo un campo relbado. Todo l cunjunto ye un spácio guapo i que solo percisa de ser bien outelizado.
L campo de bola
Todas estas cousas son buonas i amportantes, mas percísan de muito apoio i de quien las tenga siempre amanhadas. Todos sabemos que las Juntas nun ténen possiblidades para l fazer, por esso era amportante que la Câmara i las ourganizaçones de l pobo, cun las Juntas de Freguesie, fazíssen un acordo para, por todos, tratar i poner a funcionar las cousas.
Mas democratizar l mando ye l que ls partidos nun ténen deixado ne l nuosso cunceilho.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
