Pul nome, la ambora d’hoije puode parecer que bamos a falar de las arribas yá floridas, mas se ye cierto que yá ban bien guapas, nun ye desso que trata la ambora d’hoije, mas de la Feira de Saberes i Sabores, que se faç pula Páscoa i que tem l nome de ARRIBAS AN FLOR .
L Persidente de la Junta
Y ela Junta de Freguesie que ourganiza la feira i onde partecípan ls artesanos de Sendin, la Copratiba Ribadouro, la Copratiba Sendinense i las cozinas regionales i l Mini Pocas cun la sue doçarie i folares. La Comisson de fiestas d Santa Bárbela ten l serbício de bebidas para ls besitantes.
La Feira
Este anho ls spositores son menos que ne ls outros anhos porque la crise parece tener cuntaminado mais que la giente pensaba. Mas para alhá de la benda de pordutos regionales, la Feira bai a tener tamien spetáclos musicales i culturales, sendo l cumbíbio de ls moços gueiteiros mirandeses, un de ls mais amportantes.
L spositor de anstrumentos musicales
L spositor de la Copratiba
Para alhá de las atibidades de la Feira, hai muitas mais atibidades durante ls trés dies que dura la feira, mas de cada ua dessas atibidades bos daremos las amboras. Hoije teneremos la atuaçon de ls pouliteiros de Sendin, l grupo anfantil del Centro Cultural de Sendin i l grupo de musica tradecional mirandesa – TRASGA.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
