Freixenosa ye ua de las aldés de l nuosso cunceilho i faç parte de la Freguesie de Bila Chana. Pouco hai scrito subre esta tierra, mas esso nun quier dezir que nun tenga la sue stória i que nun mereça ser studada cumo las outras tierras de l Praino. L pobo ye de ls mais anti(g)os i fui un de ls mais amportantes de las tribos zoelas.
La antrada de Freixenosa
Fui a besitar Freixenosa porque querie ber l sitio por adonde passában ls homes de Biriato para l outro lado de l riu. Si, porque you cuntino a pensar que Biriato bibie mais tiempo nas arribas de l Douro, quando cumbatie ls romanos, que na sierra de la Streilha.
De Freixenosa bei-se bien la eirmita de la fiesta de ls Biriatos
L sitio de la passaige ye mui anteressante, mas nesta altura de l anho, nun ye fácele chegar alhá, por outro lado, l riu inda nun abaixou l neçairo, por bias de las obras de la barraige de Picuote, para se poder ber todo. Mas bamos star atentos para bos mostrar todo.
Ua rue anti(g)a
Un guapo cunjunto de casas
Nun bimos la passaige, mas bimos l’ancanto de la aldé i falando cun las pessonas, quedemos a saber de muita de stória i de la giente de Freixenosa. Un de ls gueiteiros mais afamados de l Praino era de alhi – Alexandre Feio i un de ls melhores de agora tamien – Angelo Arribas.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão
