Poboada zde tiempos anti(g)os, cumo l cumproba la eisisténcia dun castro na freguesie, ye ua tierra de tradiçones, cun ua arquitetura caratelizada pula sue costruçon granítica. Preserba la léngua mirandesa, donde l nome “Bila Chana” para ls mirandeses, porque an pertués ye “Vila Chã” .
Las casas de granito
La sue eigreija ye ua de las eigreijas mais anteressantes de las aldés de l Praino, yá que la sue costruçon ten caratelisticas própias, mais parecendo ua costruçon árabe cumo podeis ber ne l retrato que pongo de la frente de la eigreija. Acerca de la eigreija hai spulturas mediabales, cabadas ne l granito.
La rue an frente de la eigreija
La eigreija
La salida para Picuote, ye hoije ua rue cun casas nuobas, mas hai ua cousa que me faç pensar i que a todos deberie fazer pensar tamien, para adonde fui la giente? Morriu quaije toda? Nas cidades cada beç hai menos, nas bilas tamien, nas aldés zapareciu quaije toda, mas por toda la Ouropa ye eigual. Que mundo stamos a fazer?
La rue camino de Picuote
L HOIJE bai camino de l Naso para ber l cuncurso de ganado de raça churra, las melhores canhonas i cordeiros de l Praino ban a star alhá para ber quien ganha l prémio de melhor de la raça. Porqui bai-se fazendo por la bida, que nun mos ampáten ye l que pedimos.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão
