MALO OU BUONO TIEMPO?
Apuis de muito tiempo sien chober, la chuba apareciu meio ambergonhada al percípio, mas hoije yá acumpanhada de granizo i de pul menos dous tronos, que fui ls que you oubi. Para muitos ye ua chuba abençoada, porque se quier Abril, un més de augas mil, para l anho ser buono para l labrador.
L die staba bien carregado
Mas la bida hoije yá ye algo çfrente i yá hai muita giente que nun bibe de la laboura i esses nun s’ampórtan muito cul tiempo i até dízen: curra l tiempo cumo corrir, l miu cierto stá. I la chuba para esses até ye cunsiderada cumo tiempo malo.
Quien mira para este retrato diç que l tiempo stá malo
I l die hoije parecie querer cuntentar a todos i a seguir a ua troniada alhá aparecie ua racica de Sol para cuntentar ls que nun gústan de chuba. Para mi la chuba fui abençoada, mas la troniada nó. Stragou-me la cumputadora i bou-me a ber mal para poner l Hoije durante dous ou trés dies.
Para un lado mala cara
Para l outro assi assi
Se l HOIJE se atrasar yá sabeis porque ye, por esso tenei pacéncia, mas las amboras bou-las fazendo i « por nuobas nun bos amporteis, malas ou buonas bós las sabereis».
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão
